靚女W有麝自然香，由老總助理轉型為廣告營銷員，竟然成為阿姐級，轉工之後走上北京搞新雜誌，一樣掂，最近人生何處不相逢，佢嘅舊老闆轉工去佢間新公司，立即召佢從北京返港，做番老本行，就係去搶廣告。
既然十年間，靚女W連升十級，自不然啲銀行信用金咭追到佢實，好快就攞咗一張名貴美國運通金咭，呢張咭喺二十年前，特別矜貴，真係好難攞㗎。不過隨住時代轉變，競爭激烈，美國運通金咭已經貶值，成為普通貨，正因係咁。財務A為咗運通唔肯免佢年費，索性剪爛張咭，寄番畀運通，橫掂老客戶通常冇乜着數，新客戶反而可以有禮物，退還舊咭攞新咭，一啲都冇蝕底。
靚女W就比較珍重呢張運通金咭，年年照畀年費。一月初佢收到張新咭，上面多咗廖創興銀行嘅名，佢不以為意，重以為運通將佢「賣」咗畀廖創興㖭，但心裏未免咕咕聲，賣客都應該事先通知聲啩？點知後來收到運通來函，向佢道歉，話一時錯手，誤將廖創興銀行個名刻在張運通咭上面，所以寄上一張新嘅ReplacementCard，請靚女W剪爛張「廖創興銀行運通咭」，棄置不用。
靚女W特登傳真運通封道歉信畀左丁山睇，問我有冇咁嘅理由。嚡，梗係有啦！啲公司猛咁裁員減薪，員工可能失去士氣做事得過且過，一於冇眼睇，於是便會出錯，遲啲你哋睇見香港啲報刊更多錯字，知道點解啦！