我係裁縫關仁。洋名西門。不過叫我關師傅得嘞。
前年，田北辰同楊啟彥兩位先生做三件頭西裝。嚟我處度身，揀料、揀款。一切傾妥，開單落訂作實，保證一個月內做好，因為佢哋要着新西裝去飲。
但到咗飲嗰日仍未如期交貨。點解呢？幾個工序運作延誤（即係車唔切），布又縮水、鈕未配好，尺寸亦有差錯，要拆線再做。
交唔到貨，田生同楊生冇怪我噃。接納建議，請多一名裁縫嚟做我助手。重俾多一半銀両。又過咗一個月，未起貨。雖然幾離譜，不過佢哋派個高級職員嚟我舖頭磋商，先後四次。我拍晒心口話得！結果三個月後仍未得。兩位都未開口唧，我一口咬定一再延期係為咗將西裝做好。都揼咗錢落去，成日催，影響心情點車？「違反合約？吹呀？你哋都想套西裝好好睇睇。橫掂趕唔切去飲，不如再貼啲錢做精工啲罷啦。我遲唧，唔係唔做吖。告我就棧搞。我告番你哋㖭呀！」──我拍枱拍櫈，企得好硬。田生同楊生揸頸就命，馬死落地行，反而賠錢俾我。我真係好鬼中意呢兩個客。
後來睇電視，見佢哋搞西鐵電訊工程又係咁樣。先知原來我唔係唯一嘅幸運兒。