每年年頭孫明揚（圖）都喺鏞記請班傳媒老友吃飯，碰碰頭，敍敍舊。話題當然離唔開孫公搞政制老本行，有行家笑說，葉劉最近咁勇，又上電視台接受黃霑訪問，盡訴心中情，莫非是第三屆特首人選？
點知此語一出，即有行家大叫一聲，唔知係咪聲量太大，震到孫公手中的紅酒杯斷成兩截，幸好孫公武功高強，一手拿着酒杯部分，另一手握住杯腳，算是有驚冇險，滴酒無浪費。
原來孫公舊年亦有破杯紀錄，但原因大家都唔記得。八方於是多口問孫公，邊個有機會上位？孫公氣定神閒地說，九七年已經係公務員嘅高官相信都冇份，點解？信唔過咯。咦，咁講咪煲呔冇緣，阿松有機！
至於阿董日前喺立法會爆出會喺二○○七年前檢討政制，可能大家唔留意，其實佢老人家係第一次肯承諾，各位且記低此話。睇吓○四至○七年有冇進展。
又孫公嘅賭馬電腦程式已有啲眉目，上星期喺馬會有所斬獲，但目前勝算未足，孫公話待退休後再鑽研，咁如果阿董搵佢做部長，可能就要遲啲先至有成果啦。
E-mail：