飽受紅斑狼瘡症折磨的失婚婦人阿珍，一度露宿街頭，甚至只靠喝水充飢；另外，在一次工業意外後變成傷殘的阿芬，近日雖獲房屋署恩恤安置，惟卻沒錢繳付搬遷雜費，兩婦及時獲蘋果基金援助解困。
個案一： 「我已經幾日冇食過飯，只係靠飲水喉水，因為冇嘢落肚，我連藥都食唔到，啲關節痛到不得了，行路都要拐吓拐吓。」四十三歲的黃玉珍哽咽着說。
九○年，阿珍因為經常發高燒及臉上長出紅斑，經醫生檢驗後，發現患上紅斑狼瘡症，病情起伏不定，豈料其丈夫竟然帶着三名兒子離她而去，令她頓覺生無可戀，曾經多次自殺不遂。
「我有三個仔，其中一對係孖仔，𠵱家都應該七歲同十一歲，我已經五年冇見過佢哋，唔知佢哋𠵱家點……」阿珍說到此際，眼淚早已奪眶而出。
堅持自食其力的阿珍在非病發期內仍任職侍應養活自己。「我舊年試過冇做嘢之後又未申請到綜援，搞到要瞓咗兩日街，之後去咗露宿者之家暫住。」阿珍表示，上月她因為再次病發，全身關節劇痛，無法工作，並需留院三個星期，日前剛剛出院，卻又陷進身無分文的絕境。
「我租咗間板間房，但我已經冇晒錢，呢幾日天氣好凍，我連棉被都買唔起，晚晚凍到瞓唔着。」阿珍說。蘋果日報慈善基金有見阿珍境況堪憐，即時撥款三千元，並已送了一張棉被給她禦寒。
捐款編號：C0454
個案二： 「醫生話我嘅脊骨有幾節裂咗，𠵱家條腰同條頸都好痛，行路腳踭唔可以掂地，要用柺杖，重要戴頸箍，同埋日日都要食止痛藥。」阿芬歎道。
四十四歲的阿芬，原職地盤雜工，兩年多前在一次工業意外中，被一高處墮下的硬物擊中腰間，當場昏迷，雖經漫長的治療，惟病情並無起色，現時四肢經常麻痹乏力，完全喪失工作能力。
然而，阿芬僱主事後藉故拖欠工傷病假薪水，加上醫生未為她判傷，以致保險賠償呈膠着狀態，阿芬只得申請綜援過活。
近日阿芬喜獲房屋署編配公屋單位，惟卻無力負擔各項搬遷雜費，包括水、電及煤氣按金等，因此遲遲未能遷入新居。
蘋果日報慈善基金有見及此，撥款三千元援助阿珍，減輕其經濟負擔。
捐款編號：C0456
暖流熱線
電話：29908688
傳真：23702192
電郵：
網址：