43歲才來學砌四驅車遲唔遲？如果對於阿關來說，卻是剛好趕上，經營速遞公司13年的他，四間分公司曾遍及香港、東南亞，如今經濟不景無貨可遞，偶然上網看到小孩子愛玩四驅車，細想香港寸金尺土屋企細細，不如租下跳蚤市場開超級大「車場」，果然一擊即中，四個來自不同地區的車場，高峯期帶來月入十萬生意額！細路熱潮轉眼即逝，再發圍又是動腦筋時，果然係轉得快好世界。
文：陳文慧
攝影：陳穎、謝耀恆
「嘩！$20任玩四驅車呀。」小男孩拉着爸爸的手跑入四驅車場，兩人已經拿出手上的四驅車，在車場角落努力試裝新買回來的小靈件。另一邊廂，媽媽亦帶着小女孩靜靜在右手邊的長枱坐下，全神貫注利用彩色細砂填滿畫紙。同場還有不少年輕夫婦，帶着一子一女，來到這個兒童樂園後，像分組活動一樣，各自各精采。
這裏是將軍澳新都城三期的跳蚤市場，位於場中央偌大的四驅車場足有三百呎大，加上四周的大型「功夫陣」跳彈牀、環保碰碰車場及製作彩色砂畫及玻璃畫的長方形大枱，整個範圍足有二千呎，相當醒目齊全，難怪一家大細都有得玩。
還以為想到開四驅車場，總會貪玩或是模型發燒友吧！可是第一次跟阿關做訪問，原來他既不熟識模型，亦非上網狂熱分子。常常笑容滿臉的阿關，全因細心的觀察，為他帶來這次突破性的商機。
阿關經營速遞公司13年，生意一直大受經濟影響，客人寄出的貨不斷減少，眼見利潤只跌冇升，惟有想辦法留意市場其他發展。「點知上網發現原來好多細路鍾意砌車（四驅車）覺得香港的居住環境太細，開個大車場可能有得做。」阿關拿起放在一旁的三層工具箱，由當初連基本的車仔都未識砌要找太太幫手，到現在即場教小客人改車，都是靠上網後慢慢學回來。由於日本進口的四驅車產品價格太貴，於是前往羅湖商業城找尋國產的同類商品，投資15萬買入路軌、模型車及零件等，去年復活節租下跳蚤市場舖位，先後開設了四個車場，其中一個場剛關門，當中以新都城這個最大。
四驅車場碰上學校假期而大受歡迎，客人由幼稚園生到爸爸、爺爺都有。阿關在場內同時售賣自己代理的車仔及零件，記得當初如何改變小客人放棄用慣日本牌子的同類零件，都下了不少苦功。「開始時，細路都會話呢款係大陸貨，後來我將改裝過的車仔玩一次，又經常搞比賽，證明呢批零件一樣咁犀利。」
事實上，阿關靈活多變的頭腦，不斷增加新玩意。藉着每一個學校長假辦比賽，成功吸引更多新客人加入，亦同時令到場地氣氛熱鬧。投資了四萬元的路軌陣，在每次比賽過後重新再砌，增加新鮮感。
去年暑假，阿關的四個場之中，單是四驅車場已經是每個日賺二千。「細路日日放假，呢度日日都爆場，分分鐘都有三四十人玩緊車」阿關邊談邊帶記者四處逛，可見在場四周遍布不同的玩意，原來阿關訂購了三張大型的吹氣彈牀、還加入彩色砂畫及焗玻璃畫、又代理了500部不用電的環保碰碰車，總之每星期返內地買入最新玩具，保持新鮮感。
談到自己的速遞生意，阿關顯得一臉無奈，擺擺手表示，今年生意又跌了兩成。「現在的客人已經少寄了好多，小型的包裹或文件都盡量由自己的職員運送，即使減價幫助都不是太大。」
阿關的速遞地點主要為海外市場，由香港運往美國、東南亞、中國及台灣等。近年內地開放，本地公司北移漸多，減少了寄貨返內地。自2000年後營業額下降，阿關公司原有六名職業，亦減少2-3人，又或是全職員工改為半職等。節流方法還包括跟業主商量減租至八五折，遲些再將已經太大的貨倉改為玩具陳列室，擺放由大陸買入的玩具貨辦。
小朋友生意唔易做，阿關一語道破：「香港小朋友的讀書壓力實在太大啦，一到考試前後不一定水盡鵝飛，細路起碼比大人困足一個月溫書，點似得台灣大陸的細路，玩得咁瘋狂。而且細路好容易玩厭一樣玩具，所以成日都要有新玩具。」
小朋友不會一樣玩具玩到老，經常增加新玩具亦相當重要。阿關指一指場內的大型吹氣彈牀，「呢類型彈牀都係在網上睇到，香港很少有得玩，我重有隻40呎乘40呎的超級大龍船彈牀，遲的找到大一點的場就會拿出來玩。」場內玩具重有甚麼新玩意？阿關神秘一笑說道：「應該係向高科技進發啦！」
三個兒童遊樂場收入表
(包括四驅車場及其他玩意）
場地：新都城三期、海怡半島西翼及小欖
最初投資：15萬
高峰期（2001年暑假）
每月營業額：10萬
每月盈利：3萬
911後
每月營業額：3萬
每月盈利：1萬
速遞公司（經營13年）
員工：6人減至2人（部分轉為Part-time）
1997年前
每月營業額：10萬
每月盈利：3萬
2002年
每月營業額：3萬
每月盈利：0
十多年來以帶動跳蚤市場，現時同時管理旗下六個跳蚤市場的陳義漢。由於月租僅由千多二千元起，吸引了不少失業大軍，甚至廠長、酒店經理、專業人士加入做檔主。不過陳卻表示，十個檔主，五個輸，兩個贏，要發圍就要經常變。
「檔主要不斷肯轉貨，留意市場新興玩意，睇多的報紙雜誌。入貨品種要多，同一樣貨的款式要齊，不過數量要少，盡量避免積貨太多。而且唔好賣幾蚊件的嘢，要賣起碼十幾蚊件，每件貨都賺多的啦。其實市場變化大，生存空間一定有。」