郭羨妮入行以來，緋聞不斷，糾纏在古天樂、谷德昭與黃子華之間，但她對古天樂的感覺是病君一名，黃子華只屬她欣賞及傾得埋的朋友，與谷德昭的友誼則因避嫌而轉淡。
郭羨妮（Sonija）由當選港姐冠軍至今的兩年多以來，她與古天樂（古仔）、谷德昭（肥谷）和黃子華先後傳緋聞，但Sonija自言對這三個緋聞中的男人，從來未心動過，但三人之中，Sonija不諱言是很欣賞子華的。
Sonija與子華在拍攝現正上映的《一蚊雞保鑣》期間傳出緋聞，Sonija日前在將軍澳接受專訪時說：「我係欣賞子華嘅，呢樣我唔否認，佢喺思想同說話上，同一般人好唔同，我同佢係傾到偈，大家夾到，但唔知點解又係嘭一聲咁傳咗單緋聞出嚟。我睇報紙見到子華𠵱家有女朋友啦，自己會覺得好啦，唔再關我事。」
至於Sonija前年拍電視劇《尋秦記》時，與古仔的緋聞傳得甚囂塵上，即使到上月，二人一同出席周刊的頒獎活動，他們同場出現也繼續成為話題，Sonija說：「我哋一路以嚟都冇尷尬，係啲傳媒敏感啫，其實我到𠵱家都同古仔唔熟，係人都知佢唔多嘢講㗎啦。
「古仔畀我嘅印象係拍《尋秦記》時，佢病得好犀利，成日唔舒服，拍戲時即刻埋位，拍完就行埋一邊瞓覺，大家都冇乜機會傾偈。」但面對古仔這個美男子，難道Sonija不曾心動？她對此只笑說：「呢個世界咁多靚仔，唔通見親靚仔就咩咩，靚都要夾㗎。」
肥谷谷德昭與Sonija是大學同學，後來大家也是無綫藝員，且亦有鍾意美食這共同嗜好，他們的友情早已有根基，Sonija說：「我識肥谷咁耐，大家一路冇防任何嘢，點知同佢去食嘢俾人影咗相，又話我哋乜乜乜啦，之後大家好自然咁避忌咗，唔想無端端俾人誤會，亦都冇特登再約佢出嚟食飯。可能咁樣會冇咗個朋友，或者令到大家少咗見面，但冇法啦。」
撰文：朱芷瑩 攝影：黃文成 協力：羅慧敏 服裝提供：Seibu、RubiLi