大時大節當然要出動鮑參翅肚，今日邀請到早前榮登世界御廚駐香港大使、兼剛當選由世界名牌瓷器商華登峰‧瑋緻活頒發之TheWedgwoodAwards嘅一哥示範，今次佢不但示範點煮鮑魚，重會講埋處理、選購及保存方法，連處理遼參都會教埋㖭！
記者：葉少萍 攝影：陳智良
1.鮑魚腰圓、背厚、重身為佳。
2.舊水鮑魚兼面頭有鹽霜、色澤較深的較為好味。
1.將鮑魚浸水一晚，鹽霜洗淨，用竹墊鋪於瓦煲底，放入排骨，後放入鮑魚，最面放老雞，加入熱水冚蓋煮14小時，中途水乾馬上加水，煮夠14小時。如煮完後鮑魚唔腍，須再煮至變腍為止。
2.鮑魚未用前，用保鮮袋裝好封口放入冰格儲存，約儲存1個月。
3.新水鮑魚色澤較淡，將之放入微波爐，以高溫焗5-10分鐘，閉門焗30分鐘，放入乾盒保存，色澤變深味更好。
1.以日本關東參最好，冇乜腥味。
2.遼參刺愈多愈好味，最好選細支38支、42支。
1.先用水浸一晚，然後用熱水烚3小時，冚蓋焗３小時，換水翻烚，水滾後再焗，重複烚3次，然後將之𠝹開，用熱水將沙沖去，抹乾放入保鮮袋中，封好口放入凍格儲存，約可儲存1個月。
2.處理及儲存時，遼參切勿黏上油，會令遼參變質，冇咁好味道。
呢味阿一鮑魚係一哥成名之作，想煮得好味，除咗要選用靚鮑魚外，處理亦好重要，由浸鮑、去鹽霜、以至煮每個步驟也不能有失，咁先可煮出好味嘅鮑魚，而用外形美觀，色澤金黃，入口略帶煙韌的吉品鮑，去炮製呢味阿一鮑魚就最為美味。
吉品鮑6隻
1.燒熱瓦煲加少許鮑魚汁煮滾。加入變腍的鮑魚煮，邊煮邊用竹筷子攪。煮至鮑魚汁完全浸入鮑魚中，再加入約1-2湯勺上湯煮。
2.煮滾後加少許生粉芡，少許老抽煮，煮至再翻滾即可上碟。
除可原隻炮製外，將鮑魚切片，再配合其他材料一樣可以煮出一味好味菜式，好似呢味金銀鮑脯，就係用了營養價值高兼入口軟滑嘅花膠，配以味道較為濃郁嘅網鮑片製成，好食之餘營養又高，不妨試一試。
陳年花膠6件
網鮑1隻(切片)
1.將變腍的鮑魚切片備用。燒熱瓦煲加入上湯，加少許油，少許鮑魚汁煮。
2.落花膠煮約2分鐘，再加鮑魚片煮2分鐘。最後加少許老抽、生粉芡及油煮滾即可。
呢款花菇鹿筋扒遼參，採用香甜花菇，煙韌鮮鹿筋，配爽口遼參，口感味道同樣擁有，如果冇鮮鹿筋，可用乾鹿筋代替，但先用水浸軟，用滾水焗2小時，換水再焗，重複3次至鹿筋變軟，但味道冇鮮鹿筋咁好味。
花菇6隻 鹿筋6件 遼參6條
1.燒熱砂鍋加入清淡上湯，加少許油、少許鮑魚汁煮。
2.滾後加入鹿筋煮，滾後再加入已出水的花冬菇煮。
3.最後加入遼參同煮，煮至滾加入生抽及生粉芡煮至滾即可。
一哥煮遼參一樣得，要煮得好味，必須要選靚遼參，同小心處理及儲存先可，而呢味錦繡前程就採用日本遼參，因佢沙含量少，入口爽口，再配鮮甜鮮蝦，特別美味可口。
遼參、鮮蝦、馬蹄、西芹各4両(切粒)
青椒、紅椒各1両(切粒)
紅蘿蔔1両(切花形)
葱花少許
1.先用少許油、蛋白，將鮮蝦醃好待用。燒熱瓦煲加少許油，加入馬蹄、西芹、紅蘿蔔炒。再加入遼參炒，滾後加醃好鮮蝦炒。
2.炒5分鐘後加入葱花、青椒、紅椒炒，半熟時加少許火腿汁、少許生抽煮熟即可。
場地提供：富臨飯店
地址：銅鑼灣駱克道485號地下
電話：28912555
鳴謝：劉配光副總廚