海外試車：
Corona入替者豐田Premio

本報記者日本實地測試
早前，日本豐田車廠推出全新Premio車系（即港版Corona），論造型、設備及性能均遠勝舊有型號；惟香港代理眼見中型轎車市場有萎縮嘅現象，加上有同級Camry2.0新版嘅存在，故早已表明暫無意引入Premio，但坊間則已有水貨車行有意將之引入。究竟呢一代全新Premio有幾好？大家不如跟我哋嘅特派員，一同前赴東瀛作實地測試啦！

記者、攝影：EricCheung　協力：十木幸一郎

造型突出　富個性美
給易名為Premio嘅豐田新一代行政座駕，論造型確實較舊有Corona更見得體，而車身尺碼亦見伸延不少，予人嘅觀感亦絕對可媲美同廠Camry車系；再者，大型三角頭燈連原廠霧燈組合，以及特大闊面板嘅尾燈編排，亦能令賣相更見突出呢！

車廂鋪排　豪邁講究
講到車廂鋪排，內裏空間闊落之餘，後排椅背重可以向前收摺放平令尾廂容量倍增。然而，後排椅背重可以向後拉低，配合埋前排平放，更可以組合成偌大嘅卧牀㗎！惟頂級版雖有桃木配襯，但卻欠上皮椅及電天窗組合，局限咗Premio升格嘅元素；可是Premio嘅Top版除備有多功能AV系統連導航儀，以及倒車攝錄鏡頭之外，重有車頂嘅空氣淨化清新機，加埋原廠恒溫冷氣及高級音響組合，享受出眾。

引擎低轉　好力穩健
全新Premio車系，備有三台分別為1.5公升、1.8公升及2.0公升引擎配搭，惟全數均以慳油低廢氣排放為賣點所在。再者，頂級2.0公升版更只有SuperCVT無段變速自動波配搭，惟寧靜暢順嘅反應，加上低轉高扭力嘅雄渾演繹，卻予人留有深刻印象。而歐式懸掛設計，配合埋ABS連EBD裝置，走彎亦有一定嘅穩健性同循迹感呢！

記者試後簡評 優點 1. 線條獨特富個性，車廂空間闊落，尾排椅背既可放平之餘，重可以有靠後仰卧嘅方便。 2. 一台2.0公升D-4引擎，匹配全新無段變速自動波箱，表現動力充沛又慳油，兼且重有暢順度。 缺點 1. 新車系以行政座駕為指標，三台引擎配搭僅講求斯文及慳油。 2. 新車頂級版襯有桃木裝飾，惟電天窗或皮椅均欠奉。

本田CivicType-R規格 引擎： 1998cc直4DOHC 馬力： 152ps/6000rpm 扭力： 20.4kgm/4000rpm 傳動： SuperCVT無段變速自動波，前輪驅動 懸掛： （前）麥花臣支柱　（後）扭力連桿 制動： （前）透氣碟　（後）鼓式（ABS） 輪胎： 195/65R15 尺碼： 4600×1695×1470mm 軸距： 2700mm 車重： 1240kg 平均耗油： 16.4km/L 新車售價： 約港幣20萬起 查詢： 富利堡汽車（27143044）