新春佳節大家見到面都會講些恭賀說話，但如果部分朋友較難相約見面，又或者身在外國又點辦？其實好簡單，𠵱家六台短訊打通，只要利用手機短訊，就可將賀年語句發送畀朋友，甚至Send去外地一樣得！況且每個短訊最多都係幾蚊，點都抵過傾長途電話拜年咁昂貴！
記者：宋國榮 部分攝影：關文慧
以前新年好多朋友都會打電話同人拜年，但逐個打都幾嘥時間，用手機打就更加所費不菲。相反用手機Send賀年短訊畀朋友，能夠落足幾十個中文字，收費都只係一蚊幾毫。配合今年六台打通SMS，即是話用緊任何一個台都可以Send短訊畀朋友，更加可以利用部分手機適用的「發送至多人」短訊功能，一次過Send晒畀人。
手機短訊除已打通本港六大網絡商外，更可由本地發送去外國如中國、英國等，每個短訊收費大約只需$3，發送前在輸入的電話號碼前面加上「+」號、國家編號或地區編號便可。以中國為例，由香港發出的短訊可以傳送到中國電信、聯通兩台入網卡甚至儲值卡。而現時六台的國際短訊已覆蓋至大部分GSM網絡的國家，不過發送前記得向所屬網絡商查詢。
除了用手機發送短訊去手機外，其實還有幾種方法可以送個賀年短訊畀朋友。例如坊間就有幾個網頁提供在電腦上編寫短訊至手機的服務，另外Orange亦提供一個私人短訊助理服務，打電話上去講出短訊，便有服務員幫你Send段短訊到指定手機，對於唔熟手機輸入的朋友就最Fit！