楊千嬅前晚去蘭桂坊買桔，遭一名高大俊朗貌似方中信的男fans攬腰搭膊頭，嚇到千嬅立即彈開。而千嬅所用的手袋，是印有自己肖像的英國名牌AnyaHindmarch，她透露是朋友送給她的生日禮物。
楊千嬅前晚十時半左右出現於蘭桂坊，原來她打算新年買盆桔回家應節，但卻碰上數位熱情男fans，其中一個高大俊朗有點像方中信的男fans見到千嬅更加博晒懵，不但上前跟她搭訕，更攬住千嬅的纖腰，嚇到千嬅即刻彈開，更笑說：「啋！嚇死人咩！」
問千嬅為何不買桃花行番個桃花運，她說：「屋企係潮州人，鍾意買桔，而且桃花難打理，加上咁大棵，屋企冇地方擺。我買桔梗係會叫人送貨啦，如果自己拎，就真係變咗運桔咯！」
不過最後千嬅都只是睇沒有買桔，果然是「運桔」！
前晚千嬅攞着的手袋是英國名牌AnyaHindmarch，手袋上印有自己的肖像，千嬅說：「呢個袋係我一個朋友送畀我嘅生日禮物，佢專登拎我嘅相去英國訂做，今次俾你哋影咗，咁佢就知我有用到啦！我收咗好多生日禮物，有個fans知我想買樓，重送咗層樓嘅模型畀我㖭！」
問到鄭中基可有送生日禮物給她？千嬅說：「佢有send電郵畀我，食飯就唔使啦！」千嬅表示她沒有回電郵，她說：「咁我係收禮物嘅人吖嘛！」
對早前有報道指千嬅以五百多萬買了堅尼地城皇朝閣，她說：「我租咗呢度半年，其實好多人知我住喺度，但𠵱家雜誌講咗出嚟，我驚包租婆怕麻煩，唔租畀我咋！不過都重有年半租約。其實我一直都想買間大啲嘅屋同阿爸阿媽一齊住，但都未搵啱。」
此外，千嬅昨日出席在半島酒店舉行的BIOTHERM護膚品記者會，千嬅表示較早前已經與BIOTHERM續約再做代言人，酬勞亦有增加，千嬅謂：「其實我間屋都不知幾旺我，我之後重有個廣告，一個係內地食品，一個係續約拍念慈菴。」
採訪：顏英儀 攝影：陳偉權