呢輪，亞Mark收到唔少E-Mail，都係有關投訴本田Jazz嘅訂車問題，從中體會到嗰份愛之深、恨之切嘅感受。呢部新一代迷你CityCar，響咁短時間內激起車迷嘅迴響，又難怪佢嘅賣車數字一直節節領先啦！而據亞Mark所了解，Jazz自去年底代理落實會到港後，佢哋班Sales經已收到唔少客嘅預先訂車，而早前首批新車到港，雖然話有齊七個顏色選擇，之但係就並非七個色都係相同數量喎！因而惹起有車迷投訴話一早落訂，都要訂車至四、五月至有車交，而一眾熱門顏色，諸如鮮紅、黑色及粉藍色，更要訂車至年中才有車交都唔定㖭。
歸根究柢，早年點解豐田Echo賣車咁順利？皆因車廠夠大生產線多，正所謂要幾多有幾多嘛！相對於本田，車廠規模則細一截，咪話香港供不應求吖，就連東瀛本土方面，部Jazz都係求過於供㗎！