趙薇同葉茂青分手都超過兩年，佢哋分手同台灣女星李婷宜介入有莫大關係，之不過趙薇當時就話同葉茂青係因了解而分開。早排傳出趙薇喺上海買樓係搵葉茂青幫手，所以外間又開始流傳兩人會復合。
馮仁昭有個老友日前喺上海嘅采蝶軒食晚飯，咁啱就見到呢對緋聞情侶出現。當時趙薇好似唔係咁想俾人認出，刻意用頸巾包住半邊臉，頂帽又拉得好低，不過當時人太多，佢兩個要求坐角落位，等咗十幾分鐘先有枱。
佢兩個坐低之後，有講有笑，望落去同情侶冇乜分別，睇嚟傳聞話佢哋復合都未必假得晒喎！
謝天華噚日一見到記者，即刻話要申冤。事緣有雜誌寫佢發晒癲兼向記者爆粗，佢好無奈咁話：「根本個記者就有心整我，佢見到我就同我講話夠薑就落車，咁我落車只係想問佢係邊間報館，成段對話我根本冇講過粗口，最離譜嗰句只係話你係狗仔，一世都係狗仔。如果我真係飲醉嘅話，差佬都要我吹波波啦，又點會畀我開車走呀。」
胡兵噚日出席銅鑼灣時代廣場舉行嘅「情人節真情告白大賽」記者會，佢話今年情人節、亦即係佢嘅二十八歲生日會喺演唱會上度過。胡兵話當有新伴侶出現，就唔會喺生日嗰日開個唱。胡兵又話嚟香港發展，令佢賠上一段戀情，佢話：「個女仔嘅阿媽睇完我喺香港嘅報道之後，有啲意見。」記者問胡兵會唔會考慮喺港搵女朋友，佢就話兩地情始終有問題。
第二十六屆香港國際電影節將於下個月二十七日喺文化中心開幕，閉幕日期係四月七日。開幕電影係陳果嘅《香港有個荷里活》，另外星皓套《異度空間》亦會喺電影節放映，主角張國榮、林嘉欣到時都會出席開幕禮。另外蔡明亮嗰套《你那邊幾點》就被選為閉幕片，有興趣嘅觀眾可以去睇吓。
無綫製作部助理總監梁家樹個老婆蕭笑鳴（芭芭拉），呢輪俾人傳得罪咗無綫高層曾勵珍，所以佢喺藝員科危危乎會離開無綫。
不過據馮仁昭所知，曾勵珍喺無綫權力咁大，一個藝員科經理點敢挑戰佢，所以呢個傳聞可信性唔多高，因為珍姐要同藝員科攞人拍劇，點會攞唔到呀！芭芭拉最近先至成功說服古天樂簽番無綫，佢又點會離開無綫。