老好人噚日發威罵李柱銘，唔知係咪聽咗食力簡嘅話，唔聽話就out咗佢。不過，趙飛雲禮拜三蛇年壓歲馬捧食力簡場，輸到雞毛鴨血，幾乎染埋禽流感。
鋪完草皮哭股喪，噚日心情認真差。倉內隻深圳國際（152）跌深咗，已經輸咗5%，雖然銀碼唔係大，但睇圖有機會下試25仙，都要準備隨時跳車啦，情願低位再撈番，其餘3隻變動唔大，暫時揸住先。
晏晝食飯撞到個老友，趙飛雲請佢食飯，佢投桃報李叫留意華德豐（297），佢話隻股可能喺呢一兩日停牌配股，主要配畀兩個基金，一個係國內機構，另一個係星洲基金。聽講配股價折讓唔大，而且貨源集中，應該有得炒。跟住佢重話，配完股之後會先靜一排，農曆年後至開車，暫時唔使太心急上車，趙飛雲一向少炒消息股，不過有興趣嘅讀者不妨記存。
滙豐（005）跌穿86.50元橫行區支持，技術轉淡，如果繼續散落去，趙飛雲都會買些少滙豐Put輪9034短炒，不過就算炒都要快手快腳。