廿幾卅萬買件翻版波衫？唔係啩！去女人街或者廟街買，幾廿蚊有交易啦。話說最近有間拍賣行想將球王比利件10號波衫拍賣，標明係佢踢70年世界盃決賽着嗰件，底價四萬二美金。
好衰唔衰俾巴西老教練薩加奴踢爆嗰件衫係流嘢，佢老人家話比利響嗰場波着過兩件衫，上半場嗰件比利送咗畀佢老人家，下半場嗰件就畀個體能教練keep住。拍賣行嗰邊當然死口唔認啦，最慘比利話唔記得當年送咗畀邊個，呢勻真係口同鼻拗。
禮拜日由羅馬對祖雲達斯嘅意甲榜首大戰，牙骱味濃。從未射破祖雲達斯大門嘅羅馬王子托迪，摩拳擦掌話今次一定要入波，如果如願就會跑去南看台剝衫四圍fing。不過咪話我話，麻甩佬一定寧願睇多次舊年羅馬捧盃後寬衣解帶嘅莎比娜，多過睇哥仔托迪剝衫嘞。
一周前因去蒲吧蒲到凌晨三點半，搞到第二朝練波遲晒到嘅曼聯神經刀門神巴夫斯，被「紅魔」罰咗佢一星期薪水四萬鎊，數目睇嚟好似好多咁，但諗深一層，佢應該係賺咗，因為巴夫斯呢季嘅表現隨時令曼聯躉心臟病發，輸好多波都同佢有關，光頭門神，都係醒定啲好！
從未入過世界盃決賽周次圈對南韓佬嚟講係一條好大嘅刺，所以佢哋足球部阿頭鄭夢準就千方百計要打破呢個宿命，最新招數係南韓如果闖過首圈，國腳就可以唔使服兵役兩年零兩個月，據講𠵱家南韓有超過半隊未服兵役，如果服咗嘅就會有額外花紅，咁又真係幾君真喎，但係佢班波打中北美洲金盃都只係得個第四，唔好期望咁高嘞。
搞今年NBA明星賽嘅費城76人班主施達最近爆料，話NBA官方私下竟從二萬四百幾張明星賽門票中扣起咗一萬八千張，唔單止搞到佢眼白白見財化水，最攞命就係被迫將班長期捧場客拒諸門外，得罪晒班米飯班主。唔怪得施達大罵：「我呢世打死都唔會再搞明星賽。」