時近農曆新年，雖然話普羅大眾消費意欲低迷，發展商要搞旺商場，刺激市民消費，就要度吓計仔。好似九龍倉（004）喺尖沙嘴嘅「商場王國」海港城（圖），新春佳節的指定節目當然少不了「財神爺」派利是。嘩！唔講唔知，聽聞九倉喺海港城請嗰位財神爺果真「犀利」，薪水以日計，而且高達9999元，以一日做10個鐘計，時薪都成一千元，喺失業率高企嘅今日，咪話唔吸引，名副其實的「富貴財神爺」！不過，𠵱種富貴就十分有季節性嘞。
地產代理近來鬥爭白熱化，搞到連發展商都怕，好似華懋集團開盤，就出現因為排名問題，而發生經紀出動大批同事壯聲勢及表明自己都有份代理物業事件，搞到華懋售樓部經理吳崇武大呼怕怕，昨日佢老友張炳強開記者會，佢乘機現身講埋華懋的賣樓安排，記者問佢因何如此因利乘便，佢除咗話自己專程來「黐金糠」外，重同記者大吐苦水，話如果搞記者會，都唔知搵邊間代理行好，所以乘機搭句算數。
美聯物業嘅西九龍豪宅分行，原定禮拜三開張，但因見對手中記發生舖位被襲事件，所以臨時取消改為舉行反暴力記者會，而分行就改響今日開張。另外，美聯主席黃建業本周二帶隊出席廣州分行周年晚宴，筵開19席，據黃主席講年內會在內地開設更多分行及招聘人手。
蘭西