阿董昨日出席完立法會答問大會之後，一班記者一見議員出現就圍住不放，阿人可能趕住返屋企湊女，見到任關佩英就出賣佢，叫記者「你哋圍個惹火啲啦！」
任關回應更有型：「邊個話我惹火？我不知幾cool！」阿人不惜再加多一腳：「你啲雞火頭多吖嘛！」咁又係，雞場同街市一個接一個出事，都幾似野火蔓延，一發不可收拾。
任關話自己新年都會留港度歲，被問到新年有冇雞食，任關自信滿滿咁話：「你睇我笑得咁開心，就知道有雞食啦！」向擔心過年冇雞拜神嘅師奶大派定心丸。
不過任關其實重有好多手尾要煩，好似佢一出立法會大廳，就同黃宜弘好勞氣咁講起殺雞事件：「電視新聞都有賣啦，佢哋喺外面運入去，我點賠？」黃生好同情咁建議初犯點罰，再犯點罰。
（圖）任關佩英（中）近排為啲雞搞到有啲頭痕。
E-mail：