賓架E同左丁山講一個頭痛問題，就係銀行應該裁員還是減薪。前者涉及炒一班所謂老臣子魷魚，後者就可以宣傳為共渡時艱，人人食少半碗飯，唔食兩碗嘞，食碗半唔會死得人，而裁員就保證一啲人可以有兩碗飯，但少數人就打爛飯碗。
賓架E老闆話一人食少半碗好啲喎，更有人情味，但賓架E睇完前星期「林行止專欄」，引述一個經濟學者嘅精闢分析之後，賓架E又覺得老闆或可透過減薪而得人情之名，但最後可能對自己殘忍。
林行止篇文好精采，簡單啲講，一人食少半碗飯就係差不多搞毛澤東式大鑊飯主義，搞平均化，譬如人工最高嘅減薪兩成，最低嘅減薪半成，總體結果就係減薪一成。如此一來，平時冇乜表現、交差算數者就打死都唔走，平時超時工作、一個打三個嘅「明星」職員，就會心灰，士氣低落。本來好忠誠（loyal）嘅，都會左望望、右望望，研究吓外邊嘅機會。譬如話曼聯集體減薪，碧咸、堅尼各減兩成；科東尼、科蘭各減半成，你估碧咸、堅尼會唔會士氣高昂呢？
結論就係對公司嚟講，裁員好過減薪，美國企業不斷裁員，𠵱家獨霸全球；日本遲遲不裁員（現在就範嘞），衰足十二年，日經指數重低過杜瓊斯指數（四十五年來第一次）。賓架E嘅痛苦就係一世人相信市場，相信資本主義，但仍然在裁員與減薪中遲疑不決，可見講就天下無敵，做就有心無力。