農曆年關在即，外圍日日傳出利淡消息，企業帳目問題一波未平一波又起，跟住整多單聯合愛爾蘭銀行被詐騙7.5億美元，好似係霸菱嘅翻版。呢個農曆年假期，唔知外圍重會唔會有啲勁嘢爆出嚟，喺咁嘅環境下，相信都冇邊個敢揸重貨過年。所羅門重出報告話恒指有機跌破一萬點，叫客買認沽期權做對沖㖭。
不過阿虎覺得個市噚日跌至10409點，都重未反映上述因素，因為噚日主要係掟電訊股為主，電盈（008）及和黃（013）挫3.2%，中移動（941）挫2.5%。電訊股下跌主要同國際電訊股價值下調有關，而非因為聯合愛爾蘭銀行事件或者企業帳目問題。睇隻滙豐（005）只跌1.5%就知道真正沽壓未到，不過滙豐跌破85元，相信沽盤好快就到。
第一德勝（918）噚日爆煲，股價午後急挫67.5%，收報0.455元。i師傅話，聽講中資莊家未能北水南調，所以眼白白睇住股價急挫都有心無力。據聞炒家冇錢係因為國內銀行收緊滙款措施，即係話第一德勝可能唔係獨立事件，而係大部分中資炒家都會遇到嘅問題，所以玩呢類炒股就要小心嘞。
友力投資（674）曾經借投資澳門賭牌炒高至0.57元，跟住輾轉回落，噚日收0.28元。
澳門賭牌將於今日揭曉，Cookie話，相信友力唔容易攞到賭牌，到𠵱家都冇人知佢同咩人拍檔競投，今日隻股可能抽高後派貨都唔定。友力計劃發行可換股債券，但先決條件係佢攞唔攞到賭牌。