昨日兩隻新股德林國際（1126）同埋維奧生物（8193）都破底，小初輸少少走咗隻維奧，至於隻德林就重揸住，一來持有嘅貨唔多，二來話晒係主板股，點都好過創業板股。
不過，睇番轉頭，小初先至知道原來兩隻股真係冇炒家幫手，而冇炒家嘅新股通常係冇運行。不過就算有莊家又點？一樣可以單日跌幾成。所以有時炒股真係好似賭錢咁，要講運。
維奧噚日收報0.385元，較招股價0.45元低14.4%收市。至於德林就收1.10元，較招股價1.20元低8.3%。
另外，江山控股（295）因為獲北京控股（392）入股，股價升11.7%，收43仙。
經紀陳話，江山幕後炒家部署咗想炒好耐，但直至今時今日先至成事。噚日陣容好似好強勁，幕後炒家係本地人，以往名氣好大，但自從97年一役後元氣大傷，已經今非昔比，唔好對隻股抱太大期望。