根據食環署資料，全港最繁忙年宵市場維多利亞公園，今年設有363個乾貨攤位，如何突圍而出，絕對是一場鬥智鬥力的體驗。22位年輕人為了一嘗創業的理想，集合五萬五千成本，以及花了兩個月心血，自家設計獨門馬年吹氣玩具。雖然去年年宵賠了數百元，今年再次重振旗鼓睇好本地消費，能否財源廣進，出街之日重係未知之數，不過肯定賺了寶貴的市場經驗，以及大學無教的創業精神。
記者：陳文慧
攝影：陳盛臣
二月三日正是食環署規定可以安裝攤位的第一天，十位來自三間大學的畢業生，加上三位即將畢業的大學生，以及九位同事教友加親戚，齊集維園58號乾貨攤位，嘻嘻哈哈分工合作，爭取在一天內完成安裝。
原來這班大部分來自浸大、港大及城大的不同學系畢業生，除三人仍在讀書外，其餘全部都有正職。當中一半人雖然去年亦曾參與年宵，結果還是賠錢收場。加上香港人睇淡消費之時，憑甚麼睇好今年再入市？問到主席Mandy有否害怕年宵旺丁不旺財，小妮子一臉信心：「睇到冬季嘉年華咁好反應，證明香港人仍然有消費力。而且之前社會發生了咁多唔開心的事，今年行年宵都會想行得開開心心，加上今年年初三係情人節，所以應該都會願意消費。」
這邊廂四位女孩子開開心心拿着不同的吹氣動物讓攝影師拍照，Mandy快步拿着一個利是封走過來，原來為了今年年宵生意，上星期日剛從黃大仙求了個財源廣進平安符，據說是因為上年沒有求符，Mandy皺了皺眉：「賠了3%，大約有好幾百元啦。」
因為有過去年年宵經驗，Mandy與其餘十位舊股東相當有信心，還找來其餘十一位朋友，包括自己的教友、小學同學、同事及家人等再戰維園，以每單位$3,000一股夾錢，總共籌集了五萬資金，目標是希望賺得約10%利潤。「即係每人可以免費食到價值二百幾蚊的酒店buffet啦。」經驗搞手之一的Grace笑笑咁話。
本身畢業於市場學的Mandy，分析去年失敗經驗亦頭頭是道。原來去年售賣貨品達三十幾款，未有好好選貨，以至滯銷的留至今年。另外人手不足，只有十人根本不足以應付人潮。最重要還是定價策略，「因為唔知道幾時要減價，見到好多貨積住晒賣唔去，上年年三十晚十二點前就已經減到兩、三蚊(成本價出售)！」Mandy話因為怕賣唔出，太早減價以至賠錢，今年會更有策略訂價，不會輕言減價促銷。
除了從訂價上學精，入貨亦精選只賣七款，而且根據觀察，針對小孩子與年輕情侶，因為他們比較肯花錢。至於賣甚麼貨才會突圍而出，Grace、Feli及Candice三位女孩興高采烈地透露，開會時甚麼古怪想法都有。
Grace笑言：「覺得一年一度行年宵咁有紀念價值，可以拍即影即有賺錢。於是想起有個朋友個樣有七成似拉登，如果化妝加埋衣着，真係似到十足十，用佢做背景，以$30影一張相都好搞笑啦，不過佢死都唔肯，而且考慮到夜晚人太多，客人都行唔到入來影相，就取消了。」
在旁的Feli即插嘴：「重有設計馬頭Cushion，不過設計太精細，又要用絨布，又要隻眼仔有眼睫毛，廠家報價$30一個，成本實在太貴。」
原來想像與現實總是有距離，Candice解釋最後都係決定自行設計秘密武器：「即係𠵱家都未起貨的Q版吹氣馬仔槌。首先自己設計一隻卡通馬公仔，再找廠家生產。初頭因為要貨太少，找唔到廠做貨。大膽決定做多幾百件貨，才找到現在這間廠。」
由於過往經驗及雜誌介紹，他們都懂得前往廣州的玩具批發集中地一德路搜購。今年一行八人以一整天時間入貨，可惜貨品質素一般，訂價更比去年貴2至3成。直至透過地圖找到一個偏僻的小商場，竟然發現一批可愛的20吋高吹氣生肖不倒翁公仔發售，與負責人細談之下，發現仍未有香港人買入，於是大量購入600隻，更有信心成為全場獨家經營的公仔。
談到實戰策略，Mandy與Grace均指出已經安排妥善。自星期三第一天開檔開始，所有股東都會輪更睇檔，部分人則安排在檔外賣汽球及吸引客人，內外比例是一比二。最後三日更會全體22人出席，務求人多好辦事。
1.人手要夠大堆頭
2.入貨要準忌貪心
3.策略訂價咪驚青
年宵攤位開支表
22位股東，$3,000一股，按比例賺賠，共集資$55,000。
預算開檔日期：2月6?2日（7天）
外架及帆布：$1,000
入貨成本：$30,000
場地最後租金：$18,000（底價：$4,980）
其他（拉水電、吹氣電泵、工具及雜項開支）：$6,000
預計利潤：約$5,500（10%）