小初實在忍唔住要讚吓自己英明神武，都話藍帆科技（8166）第一日賺到錢就要走，果然噚日跌番10%。今日又有兩隻新股上市，事先講明，小初兩隻都有少少貨，所以講嘢可能有偏見。
第一隻就係做毛絨玩具嘅德林國際（1126），隻股size唔細，集資額成1.95億元，今次佢發行1.625億股新股，其中1.46億股配售，公開發售1625萬股，每股定價1.20元。
當初經紀陳叫小初要貨時，講明隻股有韓國佬認頭，所以風險有限。雖然小初對韓國佬好陌生，不過既然有人包底，而且睇落公司好似幾企理，派息亦唔弱，短炒唔掂亦可以中長線持有。
至於維奧生物科技（8193），小初就有啲愁，雖然有個私人基金認咗2.87%已發行股本，但睇番新股分配表，原來分得好散，唔多似有大莊幫手嘅迹象。不過，靚女經紀就叫小初唔使驚，如無意外，可以喺招股價樓上走得甩。