一位讀者來電郵，話佢快將退休，有一筆退休金，希望可以平穩過退休生活。佢之所以寫電郵，係因為睇咗一月二十六日嗰篇《何堪平庸》之故。
阿力士筆退休金唔知有幾大，假設你今年六十歲，以今日香港男人嘅平均壽命計，再加上醫學進步得好快，應該可以再享受二十年以上；再假設你要維持今日嘅生活水平，嗰筆退休金要嘅銀碼，可能係好大㗎，所以啲理財專家話，一開始打工，譬如二十五歲，就要儲蓄，三十五年後退休，私人儲蓄加上退休金，先至夠過活。當然，以今日嘅利率接近零計算，要儲好多先至夠，長期嚟講，外國專家話唔買股票唔得。
不過以上嘅說法，只適合較年輕嘅人；即將退休嘅阿力士，要擔心嘅係退休金嘅回報。譬如有一千萬，放響銀行戶口，實唔夠用。用嚟買按揭證券公司嘅港元債券，三年期回報約為四厘一九，即係每年收番四十一萬九千元，揸足三年，可以收番本金，全無風險（假設香港政府擁有嘅按揭證券公司唔會變成英龍），到時利息上番咯喎，再可以擺番喺銀行收息啫。
如果阿力士已經供完層樓，仔女讀完書嘅話，四十一萬收益一年，怕且夠用啩？假如退休金係五百萬元，債券收益就會係二十萬，慳啲囉。據賓架李話畀左丁山聽，到銀行買三年債券嘅市民好多係上年紀嘅人士，主要係為退休金謀出路。