位於金鐘的ThaiBasil西式泰菜餐館，曾被美國權威旅遊雜誌選為2000年全球60位最佳新食府之一，它的姊妹店littleBasil剛於九龍灣開張，同樣以摩登泰菜示人，格調亦以高尚舒適為主，基本上兩者大致相同，但當你打開餐牌一看，你便會發覺價錢平一倍，菜式新舊俱備，九龍灣上班一族以後又可多一個覓食地！
記者：黃婉冰 攝影：陳穎
一碟拼盤有晒軟殼蟹牛油果米卷、脆鴨帶子春卷、鮮芒素米卷、越南蔗蝦、沙嗲兩串。用泰式薄米紙分別包住牛油果、軟殼蟹同子薑，素米卷以甘笋絲、椰菜絲、芒果肉做餡，以清新為主，脆鴨帶子春卷內「餡」更豐富，鴨肉、帶子、粉絲、菜，食時可蘸自製的腰果香草醬，都算係矜貴版春卷。
試味報告：幾款小食都各有特色，其中鮮芒素米卷清怡開胃又唔肥，最適合女士；軟殼蟹牛油果米卷，滑溜牛油果帶有少少子薑味，配搭新鮮；脆鴨帶子春卷無論口感同味道都較複雜，其中帶子的鮮甜味最為突出，屬必試之選。
橫睇豎睇都唔多似春卷的龍蝦春卷，外層春卷皮包住用龍蝦肉打成的蝦膠，利用火候的控制，將外層春卷皮炸得較薄，製造出另一種口感，龍蝦肉面頭鋪上紫蘇葉，利用其獨特香味加以點綴。
試味報告：春卷皮確實與別不同，咬落口脆得來無咁硬，每食一口都有好香紫蘇葉味，外形令人有驚喜，與其叫做春卷，不如叫龍蝦多士，可能重貼切。
食甜品永遠係令人最期待的一環，ThaiBasil自製雪糕最出名，呢度當然有番一兩款鎮店，木瓜雪糕全用新鮮木瓜肉自家製成，炸香蕉外層是春卷皮，內裏是香蕉肉撒上肉桂粉，凍冰冰遇上熱辣辣，撞出新配搭。
試味報告：雪糕有強勁香甜木瓜味，味道天然，炸香蕉熱辣辣，外脆內軟，兼有好重肉桂香，整體來說不算太甜膩。
雞翼用香茅、檸檬葉、乾葱、蒜茸、黑椒、大量橙汁醃到入晒味，橙汁就用辣椒油、椰油、香草油調校到酸酸甜甜，辣油可以減低橙汁酸味，令味道變得清香。
試味報告：雞翼有好重香料味，橙汁酸咪咪，甜甜哋，夠開胃。
外表可能同見慣見熟的潮州滷水鵝無分別，但聞落同食落就會發覺內裏好唔同，集合泰、潮原素的滷水汁，用上二十種香料炮製，浸出來的鴨肉有陣陣香料味，每隻鴨有體重限制，只可以重一斤至斤半，否則會肉韌無味。
試味報告：未食已聞到陣陣香料味，鴨去骨啖啖嫩肉，皮下脂肪亦比一般滷水鵝少，食起來油膩感較低，亦無潮式滷水鵝咁鹹。
原條中國石斑，起肉切件蘸上大廚自己秘製的炸粉，片片炸至金黃香脆，原條魚骨都唔放過，一樣炸到脆卜卜，配以混合新加坡、馬來西亞香料的特製糖醋汁及炸香的香料蒜茸，雙管齊下，吊出魚鮮味。
試味報告：炸魚肉放上十幾分鐘，外層依然香脆，炸粉夠薄，魚肉鮮味嫩滑，糖醋汁酸酸辣辣，無傳統泰式菜館的甜酸醬咁濃稠，只蘸少少已足夠吊味，魚骨脆到可以食埋，記得唔好嘥。
店名：littleBasil香葉棧
電話：27967818
地址：九龍灣德福廣場第一期1樓F1舖
座位：142個
營業時間：上午11時至晚上11時
付款方法：現金及信用卡（Visa,Master,AE,Diners及JCB）