歲晚忙收爐，淡友亦平倉。美股大插水之後未見反彈，港股噚日走勢反覆偏軟，低見10542，向下尋底勢頭持續，但午市走勢有啲改善，最後微跌16點。期指加時階段有異動，大幅抽高百幾點，淡友平倉平得相當急，期指收報10645，轉炒高水53點。
港股將近收爐，淡友先獲利平倉十分正常，但噚日加時階段似乎搶得過急，唔通有好消息跟尾？不過就算冇特別好消息跟尾，淨係淡友平倉，相信都可以令港股造好啲收爐。
國內航空股噚日都有啲異動，近排配合重組消息已見航空股做番好啲，噚日又傳出國內將嚴格控制暗扣銷售機票，限制開團體客票嘅範圍，對航空公司收益會有幫助。趙飛雲揸中航興業（1110）當然唔係為呢啲原因，現時賣個關子，稍後適當時機再講。中航興業短線技術走勢已見改善，噚日10日線升破20日線，出現黃金交叉，守穩1.35元，將上試1月高位1.42元。
香港興業（480）海澄湖畔昨獲發售樓紙，如果賣得靚，興業會有轉機。