市道低迷生意難做，要賺錢一定要出奇招，零售業最直接梗係大減價啦。馮仁昭噚日行HMV唱片舖，發現好多唱片好抵買，每隻只係十蚊，重平過賣二十蚊嘅翻版碟。
其實HMV間中都會攞啲過時CD出嚟大平賣，不過多數都係啲唔太出名嘅歌星仔唱片，天王天后或者人氣偶像歌手嘅碟就好少有。
唔知係咪時近農曆年尾要大清貨，HMV連天王郭富城九六年出嗰隻《最激帝國》都只賣十蚊，其他碟例如張智霖嘅《黑色誘惑》、以前雷頌德同馮德倫合組DRY嘅《DRYTWO》，重有李惠敏嘅《我是女主角》，隻隻十蚊大平賣。
個個歌手做碟都話講求品質吸引樂迷，唔知佢哋見到自己張碟只賣十蚊，會唔會好心噏呢？
王菲個寶貝女竇靖童之前俾周刊影咗佢喺學校上體育堂嘅相，之後佢重同記者傾偈，話冇打電話畀爹哋竇唯外，重話連霆鋒哥哥都好耐冇見。呢單嘢見報之後，王菲不單止好嬲傳媒，重嬲埋個女，返到屋企即刻捉住童童鬧，訓示當中當然叫佢以後唔准亂咁同陌生人傾偈。馮仁昭聽到都戥童童慘，畢竟佢都只係一個小朋友，對人冇防範，童言無忌嘛！
黎瑞恩噚日喺港台接受節目《娛樂滿天星》訪問，佢話演唱會嘅嘉賓已經落實係蘇永康。問佢想唔想男友曾智明上台獻花？佢話：「如果佢真係獻花，我真係會喊到收唔到聲。」佢又話警方已經捉到日前喺街涉嫌恐嚇佢嘅其中一個男人，嗰個人喺律師樓做師爺。
俾人追債追到暈嘅章小蕙，聽講過咗新年之後，就會去上海開時裝店「Teresa」嘅內地第一間分店。北上發展啱晒佢啦，事關平時佢間舖頭成日都有內地闊太幫襯，佢哋見到章小蕙就好似見偶像一樣，章小蕙着乜，佢哋就跟住着。點解佢俾人追債都重會開分店？聽講話有個內地人投資喎！