娛樂圈中繼劉德華出名寫得一手好書法之外，原來鍾鎮濤（阿B）也沉迷上寫大字。
阿B去年五月在北京拍攝中央電視台劇集《蟋蟀大師》，趁空閒與北京唐朝樂隊主音丁武研究音樂時，發現對方有寫書法的習慣，於是阿B亦嘗試執起毛筆練寫字，他說：「一寫就上咗癮，寫得多，個人定咗脾氣都好咗，而且又唔貴，係我最平嘅嗜好，寫書法嘅紙一百張叫一刀，張張紙長四呎，都係幾十蚊咋，有排寫呀。」
阿B寫書法至今不過一年，他起初靠看參考書無師自通，但寫出來的作品都似模似樣，一次他拿作品到北京著名賣文房四寶及古董的榮寶齋裝裱，該店負責人竟叫他提供作品給他們拍賣，阿B說：「佢哋拍賣名師作品㗎，我嗰啲唔好獻醜啦。」
阿B近日更請了老師上堂學寫正統書法，他說：「我一寫就寫草書，但寫得耐都會腰痠背痛，又覺得自己好似無進步咁，咪搵老師上堂囉，有其他同學一齊上㗎，老師話我姿勢唔正確，𠵱家要練番好姿勢同基本嘢先。」
阿B表示早前送了一張書法給台灣一位友人後，該友人竟拿了去參加台灣公開書法比賽，於四千多份作品當中，成為五十位優異獎得主之一。阿B說：「我事前完全唔知，個朋友之後寄張獎狀嚟話我得獎喎，我連其他參賽作品都未見過呀，真好笑。」
採訪：蔡如玉
攝影：黃文成