中國聯通（762）母公司攞到香港虛擬網絡牌照，據聞會用嚟為國內人民提供漫遊服務，可能會搶咗本地手機網絡商生意，而且重傳到中移動（941）都會咁做，嚇到電盈（008）、數碼通（315）與Sunday（866）遭拋售，電盈跌破1.90元關口，收1.89元，數碼通重大跌7.4%，跌破10元大關，收報9.95元。
不過Cookie留意到今次力沽數碼通嘅係英資大行嘉誠證券，而且成交高達3496萬股，可能同大戶減持有關，唔知係咪持股量達20%嘅英國電訊開始減持，抑或有人預知英國電訊將有行動，所以預先偷步沽貨呢？
神州醫療（8186）周二下跌近10%後，噚日再跌多30%，成交高達7209萬元。黑客話噚日班大戶似大舉散貨，京華山一曾好努力維持秩序，但最終都頂唔順，有棄守迹象。
神州醫療去年12月由0.50元炒上，上個禮拜最高升至1.25元，都係時候散貨嘞。據聞有大戶喺0.70至1元水平收咗唔少貨，噚日已跌至0.7元水平，如果再急跌落去，大戶可能會損手。
上海復旦（8102）噚日停牌話等候宣布配股。e莉莎話，聽講有台資入股，買超過10%股權，完成配售後，復旦就會開車，可能會炒上1.60至2元水平。
瑞源（476）最近被質到落1仙後，沽盤重排晒長龍，但噚日好似有班敢死隊入市喺1仙接貨，唔知係咪有人想收集再炒過？