快將推出嘅全新奧迪A4Cabriolet開篷車，較早前廠方經已為其「放風」，並惹來一眾車迷對其產生興趣；到最近，廠方又正式公布咗關於新車嘅詳細資料，好讓有興趣嘅車迷有定買車嘅「心理準備」。
首先以造型而言，A4Cabriolet嘅賣相與新款A4相近，除富有年輕活力感外，而且重帶點高貴典雅嘅味道；另一方面，新車嘅篷頂屬電動開關設計，只需30秒內便可完成整個過程，使用甚為方便。
講到車廂方面，全新A4Cabriolet除來得寬敞舒適，兼可讓你擺放多件行李外，新車車內更備有不少豪華設備，當中包括有高級真皮座椅、桃木裝飾、恒溫冷氣及高級音響等等，全都無一或缺，用落亦見方便容易。
而廠方又為全新A4Cabriolet，配用2.4及3.0公升嘅V6引擎，馬力輸出分別為175匹及227匹，加上有5前速手波或Multitronic半自動波箱嘅配搭，從而令新車可有更出色嘅行車表現。而新車亦有望於今年下半年抵港，有興趣嘅車迷就要記住到時留意下喇。