新年將近，各位型仔型女勢必扮到靚靚周圍蒲。最近坊間就興起一種色彩鮮豔的螢光手機繩，本身由螢光顏色的膠料造成，在紫外燈照射下便會發出夜光，而且顏色及外形設計又多，更可刻上各式字句或名字，新年落D包你最搶最「螢」！
記者：宋國榮 攝影：林栢鈞
Model：Coby（CoolFactory）
鳴謝：頻率Disco
這款閃燈加螢光手機繩有多種顏色選擇，包括紅、橙、藍、綠等色，另外再分有淨色及刻有直條紋兩種。掛在手機上，當有來電時便會發出閃燈，喺Disco裏面跳緊舞時，黑暗環境中有燈閃吓閃吓，必定最搶眼。
年初三撞啱西方情人節，想送條手機繩畀Honey，可選擇在螢光手機繩刻上名字或愛的宣言。例如一個心形分成兩半，各自刻上自己個名，又或者刻上「ILoveU」等字句，總之想刻乜揀邊種形狀都可以幫到你！
唔想手機繩咁千篇一律，可以選擇呢款寫晒抵死語句的螢光手機繩。例如D場最興講的一句「遠睇誇啦啦」，又或刻上各種大熱產品、電影、漫畫名稱的「頭文字D」、「無限R」等等，既可裝飾手機，亦能Update自己學吓潮流用語。
這款以星座為主題的螢光手機繩相當過癮，十二星座集齊之外，更能一分為二：一邊畀自己；另一邊就畀Honey用。買齊兩個星座更可以互相交換一半，得閒拼埋睇睇都咪話唔溫馨！
近幾年Disco熱又興起，螢光棒甚至這些螢光手機繩大派用場。現時本港大約賣到$10一條或以上，但其實在深圳一些手機配件市場，卻可以用幾毫子的批發價買到。香港售價抵唔抵就見仁見智，不過可以肯定的是，用厭了快快趣換過第條的年輕人還大有人在！
地址：旺角豉油街地下50號舖（近女人街口）