經紀陳今次真係好帶挈，藍帆科技（8166）確係有得炒，小初噚日膽博膽，淡市玩即日鮮，估唔到又賺到多少過新年。收市時經紀陳重話未升完，但小初就唔理咁多，賺咗就算數，因為小初對呢隻股認識唔深，無謂揸咁耐。
藍帆噚日真係勁，收41.5仙，較招股價24仙高出73%，成交金額有成5800萬元，當然其中好多係小初之流嘅即日鮮。
收市後，小初睇吓揸住藍帆兩成幾嘅海域集團（1220），發覺隻股完全冇受惠，重要倒跌2%，收9.8仙。究竟點解呢？
另外，就快改名兼轉型嘅偉栢集團（491），由11.3仙高位回落到9仙橫行咗一輪後，近兩日成交多番啲，似係重整旗鼓，想再來一次。聽靚女經紀話，幕後炒家諗住再炒一轉。
小初覺得偉栢揀新年前開車唔多合時，話晒人人過年等錢使，唔想責住啲錢過年。