曹仁超話積金局總裁肥仔許會喺今年六月離職，以示唔恨做，免得啲議員指指點點，唔見有人證實，不過以曹仁超平時消息之靈通、線路之廣，相信佢言必有據嘅。
與議員吃年夜飯，議員認為自九鐵爆出工程合約賠款嘅新聞之後，楊啟彥好難捱，楊總本人嘅公眾口碑，本來已經係C減嗰隻，𠵱家更難服眾。有乜解救方法呢？議員話：「以後所有公營機構啲老總（主席、行政總裁）都唔應該由退休高官擔任，既然我哋出得起咁高人工，理應全球搜尋人才，由北京至北歐，由廣州至美洲，唔信搵唔到一啲精英鐵路管理專家肯為年薪一百萬美元而撲來香港就任，點解一定要分豬肉畀啲退休局長啫。」
議員講得好啱，正常人嘅想法，理應如此，但以「陰謀派」嘅思維，議員比較單純矣。你估真係厚賞之下無勇夫咩，只不過特區政府高層患上干預症候，誠恐啲商業化經營嘅公共機構在非常時期唔多聽使（如金融風暴），唔配合政府政策，所以先致安插啲退休局長做老總而已，唔講任志剛，即使係許仕仁、鄺其志、蘇澤光、楊啟彥，以至私營公共交通機構嘅陳祖澤、許雄等都係前政府中人，萬一再發生暴動，曾蔭權、梁錦松要統籌全局，同啲高官出身嘅老總傾密偈，實施「道德說服」都容易好多喇，唔通李福兆會比鄺其志更易聽話咩。