投資界一片中國熱，外資行高層要進軍中國市場，第一件事要改番個好聽又易記嘅中文名，好似摩根士丹利亞太區主席文禮信（AlasdairMorrison）咁，又文又禮又信，中國人睇到當然加啲印象分。
大摩昨日請食晏，文禮信同八方講咗個秘密，佢話十年前佢重係怡和大班嗰陣，中文名叫「莫禮信」，同佢個英文名發音比較接近，佢唔識中文，唔知呢三個字代表無禮兼失信，後來經高人指點，嗱嗱聲改「莫」為「文」，如果唔係會俾人笑到𠵱家。
席上大摩亞太股票策略員賀嘉博（AjayKapur）聽到，即刻問八方佢個中文名掂唔掂，八方話呢三個字係祝賀同埋讚揚佢學問淵博咁解，佢聽完成個安樂晒。
E-mail：