每逢大節，蘭西都會收到不少公司寄嚟嘅小禮物，有啲都幾別出心裁，好似新地（016）旗下嘅SignatureHomes就寄咗一對紅燈籠嚟，下面重掛咗個一面係「招財進寶」另一面係「如意吉祥」嘅牌，好應景，聽講呢對燈籠會送畀SignatureHomes旗下嘅租客，等佢哋（主要係外籍人士）感受一吓中國嘅傳統藝術。
臨近年尾，好多行業或公司都會減少搞作，準備收爐，但地產代理就繼續開分行，美聯物業位於尖沙嘴嘅西九龍豪宅分行就會響今日開張；而利嘉閣地產嘅天水圍嘉湖銀座分行亦在同一天開幕。
另外，香港興業（480）今日將公布大嶼山愉景灣海澄湖畔一段嘅最新銷售動向及優惠方法，而記者會地點則定於金鐘嘅香格里拉酒店，印象中佢哋每次安排嘅地點都唔同。至於嘉華地產就響今日為九龍塘嘉皇臺舉行記者會。
金庸小說發燒友相信對明教教主張無忌絕不陌生，專做街坊生意的電器舖「張毛記」，則廣為新界區居民熟悉，近期更進駐一線舖位擴充業務。中原地產潘志明透露，新租用的舖位位於元朗市中心青山公路111至113號全幢，面積6200方呎，每月租金近15萬元，因同區安寧路分店進行修路工程，故承租上述原由廣東省銀行自用舖。
蘭西