年近歲晚，又係選購年貨嘅時候，唔少朋友都鍾意去大型百貨公司掃年貨，事關佢哋嘅貨品又齊又多款，行一轉就可以買齊所有嘢。今日我哋搵咗經常行百貨公司嘅陳太，帶大家去西田同吉之島辦年貨，一齊睇吓佢介紹大家買乜嘢！
記者：何麗儀 攝影：周旭文、林志恆
ImageLady：Pecky
陳太小檔案
家庭主婦，仔女已十多歲，周日最鍾意同老公蒲百貨公司，所以對百貨公司貨品最在行，喺邊間百貨公司有乜嘢正貨，問佢就最清楚。
驟眼看上去十足十一個蒸籠，不過睇真啲，原來是一個全盒。這全盒是由人手用木和竹製成，兩層設計而且重有一個木手挽，小記就覺得佢好有田園風味，最襯簡簡單單嘅家居布置。
尺寸：直徑15.5cm
售價$120
如果親朋戚友多小朋友的話，我提議大家不妨買呢個的骰又得意嘅米奇全盒，呢個3層高嘅全盒外形特別，棗紅色嘅正方形盒面有米奇在燒爆竹，盒身又有米奇圖案作點綴，全盒每格都可放唔同嘅糖果，大人細路都話得意！
尺寸：長13cm、闊13cm、高13cm
售價：$88
經濟不景，發大財肯定係所有人嘅最大心願，所以唔少人都會趁馬年喺屋企放隻招財馬旺吓自己。呢隻馬仔頭大大眼仔碌碌，左手扶着寫有「千萬両」嘅木牌，右手呈招手狀，喻意為大家招來黃金千萬，與招財貓有異曲同工之妙。
尺寸：高12cm、闊7cm
售價：$48
過年有親戚到訪，少不免會一齊食吓水果，呢個彩馬擺設連水果叉就大派用場。呢隻富東南亞色彩嘅彩馬唔單止係馬年擺設，入面重有6隻水果叉，每隻叉都有馬頭公仔作裝飾，我覺得佢又靚又實用，價錢更加係超值，好抵買！
尺寸：長10.5cm、闊5.5cm、高9cm
售價：$50
每年農曆新年，我都會買啲賀年鮮花返屋企，以增添新年氣氛。當我第一眼近距離見到呢盆水仙花時，還以為百貨公司有水仙花賣，我就決定買佢心入面就諗：「咁靚嘅？做乜忽然有鮮花賣嘅?」點知一星期後再同老公行西田又再見到盆水仙重係好靚咁放喺度，我就冒昧向售貨員查詢，方知呢盆水仙原來係由人手製成，每片花瓣都由人手搓成貼合，難怪真像度咁高，放喺屋企真係易打理又有氣氛！
尺寸：高32cm、闊217cm
售價：$1,180
行花市時買盆桔係好多人嘅指定動作，不過當諗起要自己抬盆桔返屋企就怕怕！所以今年決定改買人做賀年桔仔擺設。搵到呢盆體積細細嘅桔仔擺設，易拎又易打理，就算叫老公攞盆返公司擺都得。每盆擺設約有10個桔，特細嘅花盆顯得桔仔更大更圓更得意，見到都開心！
尺寸：高13cm、長、闊9cm
售價：$98
過新年咁開心，唔少父母都會大破慳囊替小朋友買番套賀年衫，要買小童賀年衫的話，我發覺吉之島最多款揀，唔信？一齊去睇吓！
我始終覺得細路女着粉色調嘅衫特別可愛，所以一定要將呢套夾綿衫褲套裝推介畀大家。呢套淺紫色套裝觸感柔軟，反光布料上又有紫色梅花圖案，看上去非常和諧。全套衫褲內層都加咗夾綿布，所以小朋友肯定會暖笠笠。
尺碼：80cm-100cm
售價：一套$125
如果仔仔有成七、八歲，要佢着套七彩唐裝去拜年都幾費勁，不如揀套平實嘅款式。呢套唐裝衫有金色及藍色，除咗有長袍外，重有一件小背心，兩者都有夾綿，所以保暖效果理想。
尺碼：110cm-140cm
售價：一套$181
好多爸爸媽媽都鍾意幫自己嘅小朋友扮鬼扮馬，而呢套男童拜年衫肯定係最佳選擇。呢套衫有長袍、背心、長褲同埋帽，淺黃色嘅花布綑了金黃色邊；紅色嘅小背心夠晒搶鏡，上面印有一個個的壽字，就更加係我最欣賞嘅地方。
尺碼：80cm-100cm
售價：一套$139
西田百貨（26941111）
沙田新城市廣場三期
吉之島（28846888）
鰂魚涌康山道2號康怡廣場南座