呢幾日英皇啲藝人，好似容祖兒同陳冠希咁，都趁新年前紛紛離港，表面睇就話要出外進修，馮仁昭就知道查實係別有內情。
楊受成向來信到十足嘅城中高人陳伯，繼提點楊受成要專發掘旺佢嘅屬猴新人力捧之後，喺嚟緊嘅馬年又有新指示，就係要楊生旗下班馬騮仔女，喺今個農曆新年一定要離港暫避，否則班馬騮就唔利佢。
向來迷信嘅楊生，聽過陳伯之言就叫班馬騮仔女速速離港。所以祖兒要去英國、美國同日本等地進修，連陳冠希出道得年幾，都話要佢讀書。
至於英皇旗下其餘兩隻馬騮仔女何嘉莉同謝霆鋒，前者一月尾就走咗去台灣話出唱片，要等過完年先返得嚟。霆鋒咁啱得咁蹺，都會唔喺香港，去咗法國拍電影《戀愛行星》，就算新年返嚟，都可能會出門旅行，避咗個農曆新年。
謝偉俊（Paul）律師行前晚喺尖沙嘴福滿樓搞團年飯，筵開十四席。
白姐姐前晚着咗套綠色套裝，佢話件衫係律師行九七年開張時着過，阿Paul當時送畀佢，值萬七蚊喎。白姐姐重呻話佢當年做新城DJ，阿Paul重係大律師，兩個加埋年薪成五百萬，但𠵱家阿Paul將啲錢貼晒畀律師行，搞到佢都cheap晒，只可以行女人街食魚蛋粉。阿Paul就話：「呢啲叫嫁雞隨雞。」
何韻詩近日愈嚟愈受外間注目，噚日佢喺港台出現時話：「呢排我揸住架車去旺角同銅鑼灣，啲人見到我都猛咁同我揮手sayhi，佢哋重叫我努力啲！」
何韻詩重話可能自己架車容易俾人認到，而且啲人都係出於好意，所以都冇乜所謂。
羅霖、陳煒、樓茜妮、黎思嘉、黃浩然同埋陳展鵬，噚日分別出席亞視《有求必應》同《豐衣足食》宣傳活動，羅霖比原定時間遲咗到場，但佢好唔好意思咁話：「我今日為咗剪頭髮，所以遲到，我老公都有陪我一齊去。我八年冇剪過咁短，以前自己好堅持唔剪短髮，有次導演要求我剪，但我都唔肯，最後連角色都冇咗，不過𠵱家年紀大就冇所謂啦！好彩個個都話好睇。」
林建明噚日去咗珠海幫佢老友開嘅「豐豫小肥羊火鍋城」做剪綵嘉賓。大姐明話自從佢主持亞視遊戲節目《各出其謀》後，多咗好多廣告同剪綵搵佢做，包括超市開幕同樓盤廣告。提到近日《各出其謀》收視有下跌趨勢，大姐明話：「唔知喎，呢啲起跌常見嘅，我有信心會升番，因為過年有個三代同堂嘅新春版，可以吸引番啲觀眾。」