八方噚日收到漁農自然護理署嘅年報，玩咗一陣先打開本書嚟睇，冇錯，真係玩咗一陣。呢本年報創意澎湃，封面設計一絕，書皮側邊有個齒輪，當你轉吓佢，封面個漁護署標誌就會呈現唔同嘅公仔，有中華白海豚、珊瑚魚同有機小南瓜等等。
此乃前漁護署署長韋徐潔儀退休前嘅傑作，正所謂金玉其外，年報嘅內容就真係冇乜新意可言，來來去去都係耳熟能詳嘅漁護署工作，不過當中都有啲趣味數字。上年有五百幾位駕駛人士懵閉閉，駛咗入佔香港四成土地嘅郊野公園，罰款總共差不多二十五萬；唔好以為喺郊區亂拋垃圾冇人知，上年就有五百幾人被罰，合共罰咗成二十六萬，漁護署唔係剩係識殺雞㗎！
E-mail：