新車速報：<br>新版現代Sonata　足以抗衡日本車

新車速報：
新版現代Sonata　足以抗衡日本車

近年汽車科技發展突飛猛進嘅韓國車，款式及級數絕對可媲美日本出品，而早前呢款全新現代Sonata，響美國一項Consumers測試當中，更凌駕同級日本車而奪魁；你可以唔認同美國人嘅口味，但新車抵港，你又點可以唔去親身感受一下呢！

記者、攝影：陳偉林

歐陸線條優美吸引
呢一代新款Sonata確實較前改進不少，諸如造型經已更靠近歐洲車風格，或許跟Sonata以歐洲市場為主導可謂不無關係。當中一對雙圓聚焦車燈，同樣以雙圓燈組合嘅尾燈編排，重有鴨尾狀嘅車尾輪廓，均予人留有深刻印象；惟FamilyLook嘅車頭鬼面罩，卻予人有點格格不入之感。



車廂鋪排　豪邁富品味
探頭入車廂中，你會發現前後兩排皮椅用料講究之餘，剪裁亦見貼身富承托感；四周更以桃木粉飾，重烘托出一分豪邁個性。內裏設備除有四門電窗、門邊電鏡及中央門鎖外，重有原廠恒溫冷氣及雙安全氣袋㗎！而尾排椅背重可以左右獨立收摺，以方便騰出更大嘅載物空間㖭。



引擎表現　順滑動力足
新款Sonata匹配一台全新2.0公升直4DOHC引擎，表現順滑寧靜兼有突出嘅加速力，而一套4前速+/-半自動波，亦見反應敏銳暢順；難得操控予人平穩外，走彎支持力及循迹性亦頗高，加上有TractionControl及配有四輪ABS連EBD裝置，令駕駛倍見安心呢！



現代Sonata2.0規格 引擎： 1997cc直4DOHC 馬力： 133ps/6000rpm 扭力： 18.1kgm/4500rpm 傳動： 4前速半自動波，前輪驅動 懸掛： （前）雙搖臂　（後）多連桿 制動： （前）透氣碟　（後）碟式（ABS） 輪胎： 205/65R15HankookOptinoK406 尺碼： 4747×1820×1422mm 軸距： 2700mm 車重： 1200-1380kg 新車售價： 約港幣13萬 車輛提供： 太古亞洲汽車（25272777）



記者試後簡評 優點 外形： 造型有突破，予人有歐洲車嘅觀感。 車廂： 高級皮椅包裝吸引，乘坐貼身舒適。 設備： 除電窗、電鏡外，少不了原廠恒溫冷氣。 操控： 引擎反應敏銳順滑，有出眾嘅循迹表現。 缺點 1. 車身線條已盡量擺脫韓國車作風，惟FamilyLook嘅鬼面罩，卻予人有失色之感。 2. 入門版稍欠設備，尤以電控座椅更欠奉，而桃木裝飾亦稍嫌欠缺美感。

Sonata另類Brown-Bag測試勝Camry
早前，響美國南加州嘅大型購物商場，舉行咗一次獨特嘅汽車測試，特別搵嚟528名顧客，即場駕駛兩部分別給蒙起廠徽、鬼面罩等部件嘅新款現代Sonata及豐田Camry，竟然響當中5項評分中，Sonata均取得壓倒性嘅優勢而勝出，可想而知除包裝以外，韓國車的確係進步神速噃！