大市受外圍拖累，早段裂口低開，恒指落到10541的今次調整市新低，但沽壓未見重，之後行情就在窄幅內上落，全日高低位相差僅95點，市況之淡靜，可以得見，收市險守在10600之上，報10609，跌112點，成交60億元，期指又轉低水。
大市繼續尋底，10400至10500水平大有可能係調整低位所在，以周期計算，低位在未來幾日出現的機會甚大，但由於年假及月小關係，即使大市見底，今個月大市亦唔會有大作為，恒指預期會在10400至11000間窄幅上落。
下個月，大市可現突破。目前港股較大阻力在11000位，若重返其上，則證明調整已完成，再起升浪。由低位起計，估計下一個上升浪可持續8個至10個星期，上升目標係13000。目前250日線在12197，將係下一升浪的主要阻力位所在，相信要經一番爭持，才能衝破，只要恒指重上250日線之上，則牛市重臨，便可確認。
唔少人對結構性赤字表示憂慮，認為會動搖香港的金融體系，股市亦可能會受到影響。不過，持有不同看法的人亦有不少，至少官方就有信心，可以順利解決呢個問題。雷曼兄弟亦認為，在經濟低潮下出現龐大赤字，難以避免，以香港的情況而論，擁有龐大的財政儲備，足以抵禦任何不利的衝擊，雷曼指有關問題實在被市場誇大，香港暫時亦毋須急於加稅，以達致收支平衡。
金管局副總裁簡達恒早前講過，香港銀行去年經營陷入困境，盈利會出現倒退，東亞銀行（023）係第一間派成績表的銀行，整體業績並未有令市場感到「意外」，去年盈利果然下跌，跌幅係15.2%，超過市場預期。
銀行股將會陸續宣布業績，有東亞在前，相信大家都唔會寄予厚望，去年盈利下跌5%至20%，應該係較中肯嘅估計。