《魔戒》效應無處不在，好似呢隻即將推出嘅《DUNGEONSIEGE》，故事條橋就係講一個農村細路，因面對惡魔襲擊，因而連同友伴一齊反抗，絕對食正𠵱家《魔戒》熱潮條水。不過最令人驚歎嘅，都係佢勁靚嘅畫面，基本上遊戲是以類似《Diablo》嘅第三身視點進行，不過場景就全改用3D立體製作，加埋畫面有ZoomIn功能，喜歡《Diablo》冒險遊戲嘅Game迷，呢次又有新挑戰啦！
文：李淮
遊戲設計大師ChrisTaylor，喺1997年憑着經典即時戰略遊戲《TotalAnnihilation》，成為PCGame壇巨星，後來索性自組公司——GasPoweredGames，頭炮作品就係今日介紹嘅《DUNGEONSIEGE》！
《DUNGEONSIEGE》是一套集角色扮演同即時戰略於一身嘅PCGame，不過遊戲中玩家並非扮演乜嘢英雄人物，相反只係一個生長於農村嘅15歲細路（可選擇男或女），過住啲斬柴養雞嘅樸素生活，點知突然有一日條村無端端走咗班怪物出嚟大肆破壞。睇住自己養嘅畜牲逐一被殺，主角登時火滾到極點，不但止唔逃走重拎起把鋤頭奮力還擊，亦正式開始佢嘅奇幻歷險旅程，感覺上真係有幾分似《魔戒》條橋。
另外，不得不讚遊戲嘅畫面，基本上，遊戲進行時是以類似《Diablo》嘅第三身視點進行，不過Game嘅人物、建築物同物件，則全以3D立體製作，如果你轉動Mouse上的滾輪，佢重有即時ZoomIn嘅功能，遊戲界面之靚，絕對係同類Game中頂級作。
整個遊戲歷險過程預計最長可達60小時，雖然玩家可以操控主角單人歷險，不過實力肯定弱得可憐，所以隨住遊戲嘅推展，玩家可以在歷險中加入新的戰友（連玩家最多8個），當中有巫師、戰士及箭手等，可以任由玩家配搭，自由度非常高。
作戰環境方面，《DUNGEONSIEGE》嘅最大特色，就係可以因應團隊中不同角色的特性，個別調節他們遇上戰鬥時所作出嘅應變，例如防守、進攻、射箭等等。除此之外，你重可以預先設定全隊8人嘅作戰陣勢，有乜唔對路，團隊眾人便會自動埋位，唔使下下都好似教仔咁逐個控制，亦唔似其他同類型Game咁，一有敵人出現就要亂打，等你更盡情享受作戰樂趣。
任務（Quest）是RPG不可或缺的重要元素，不過對於任務嘅設計，ChrisTaylor就完全有自己一套，覺得傳統RPG嘅一項一項順序式任務真係太過呆板，所以在《DUNGEONSIEGE》嘅Quest中，會加入好大嘅自由度同互動效果。
舉個例子，當團隊過橋時其中一人唔小心失足跌入谷底，玩家這時便要決定應該搵路會合番出事嘅隊友，定係將錯就錯一齊跳埋落去？而且一切由你話晒事，有鑊當然亦由你自己孭啦！而且每次嘅決定，都會直接影響到故事有不同嘅進展。
發行：Microsoft
開發：GasPoweredGames
預定發售日期：2002年4月4日