講到食海鮮，好多人覺得要山長水遠去鯉魚門、西貢先至似樣，但查實只要新鮮、價錢平，就邊度食都一樣，記者最近就發現油麻地一檔有11年歷史，以鑊氣強勁、材料新鮮出名的海鮮大牌檔，其海鮮小炒連外地遊客都識得按圖索驥搵到嚟試，身為地道人唔想後知後覺，就快啲先睇睇有邊幾款係必食之選！
記者：黃婉冰 攝影：伍慶泉
雖然有大量強勁蒜味掩飾，但大廚堅持用新鮮游水花蟹，貪佢肉多、鮮甜、口感好，即叫即劏即炒，蟹身拍上麵粉炸至乾身，令味道同蒜茸可以掛上蟹身，食起來更入味，送酒最好。
一碟分量都幾多，蟹身肉厚鮮甜，唔會又腍又霉，入口有勁香蒜茸味，鑊氣十足，蒜味同蟹味分明，互不遮蓋。
師傅話用來炸的蠔唔一定要大，太大隻反而會難熟，所以大廚揀選蠔肚飽滿，身材有手指般長的來炸，外層脆漿亦講究，油、水及蛋的分量要適中，炸出來的脆皮先可以香脆堅挺，唔會成口粉。
咬落去唔會成口炸漿兼油淋淋，都幾脆口，藏在裏面的生蠔又唔會過熟變得韌，依然食到其鮮味，即炸即上枱，入口依然熱辣辣，這點稍勝酒樓。
大牌檔紅牌菜，最高紀錄一日賣成50斤，選用的沙蜆隻隻都脹卜卜，用豉汁、辣椒等炒過後，蜆肉無走樣勁縮水，隻隻黐住個殼唔會甩晒落碟底，不知所終，全靠大廚以短時間極速炒起上碟，豉椒汁濃度剛好，但嗜辣的人可能仍覺辣度還未夠。
比起大多數大牌檔，這裏的蜆肉較為大隻肉厚，但唔會炒得過韌，豉汁味道校得夠香，用手攞住食，先可以食到大牌檔獨有的風味。
做椒鹽蝦，走油部分最緊要，蝦身要炸得夠乾，但蝦肉依然嫩滑鮮甜，炒起嚟先唔會水滴滴。加入炸至金黃的蒜粒、辣椒以及由美極、花雕、豆瓣醬等混合調校的汁料快手炒香，炒出來的中蝦，蒜香陣陣，是不少遊客的至愛。
味道啱啱好，唔鹹唔淡，蝦殼黐滿香蒜粒，調味料最為惹味，蝦肉唔會黐殼，夠晒新鮮。最好係食完唔會口渴，碟底又唔會油得可以照鏡。
芝士牛油向來是龍蝦的老拍檔，今次換咗田雞都絕不欺場，牛油芝士另加入椰汁、花奶，煮出來的芝士汁就會香濃滑溜，難怪成為第二號受歡迎菜式。
田雞未食已經聞到陣陣芝士飄香，牛油與芝士味道均勻，田雞唔係太大隻，所以肉質較嫩滑唔會嚡，芝士汁分量勁多，芝士迷實鍾意。
這裏除蠔仔粥外，另有䱽魚肉碎粥，由飯和上湯做粥底，上湯用雞、豬𦟌、火腿煲足六個鐘重未夠，加入䱽魚、豬肉碎、冬菜、大地魚、葱等配料再滾一滾，魚肉鮮味盡落粥底，甜上加甜，多人的話可以叫一鍋一齊食。
䱽魚肉碎粥還是第一次食，雖然唔似得蠔仔粥咁啖啖肉，但勝在多了一分魚鮮香，魚肉滿滿上場，肉滑清甜，啖湯更加係成碗粥嘅精華所在。
經營源記十一年，每日都會親自落手落腳做埋一份，佢話夜晚同假日七點幾開始到九點就最多人，真係做到無停手。
電話：23841686
地址：油麻地吳松街熟食中心4號檔（永安百貨後面）
座位：約200個
營業時間：上午11時至下午2時，下午5時至凌晨2時。
付款方法：只收現金
備註：不設加一，年三十收爐，年初二啟市。