美股過山車，港股潛水艇。美股近日大上大落，認真難捉摸，而港股則似潛水艇，沉多過浮，愈揸愈心寒。
雖然如此，趙飛雲重未跳車，原因除咗所揸嘅唔係恒指成分股之外，其實亦感覺到隻「潛水艇」將近到底，就快會轉頭回升。杜指及恒指嘅9RSI已出現背馳現象，雖然唔代表唔會繼續跌，但算係初步見底嘅訊號。
東亞銀行（023）公布業績較預期差，但跌近15元密集支持區終於反彈，倒升5仙，收15.45元。東亞公布業績前急插水，要佢以塔形底方式反彈相信好難，反為要留意重會唔會跌穿15元，繼續尋底。
滙豐（005）3月4日公布業績，其實只係重有13個交易日，芬佬如果有行動，好快就睇到，不妨留意定啲Call輪及Put輪邊隻數據靚，可能會有大豐收。
趙飛雲冇買嘅南方航空（1055）同中旅（308）都逆市造好，反為倉內嗰4隻股縮吓縮吓已經冇乜錢賺，真係冇癮，希望今日啲馬仔生性，過番個肥馬年。