籃壇「波神」佐敦嘅太座祖安妮達，上個月話同結婚十二年嘅佐敦離婚，但點知前日峯迴路轉，兩人一齊發表聲明，話宣布撤回離婚申請，希望重修舊好。
雖然我哋局外人好難知道佢兩公婆嘅家事，但估計好大機會係錢作怪，因為祖安妮達當時重要求三位寶貝仔女嘅撫養權同埋分佐敦一半身家，而且佢兩人當年應該冇簽嗰啲婚前協議，所以如果大家真係簽紙作實分手，佐敦按花旗法例，應該畀成十五億港紙當掟煲費，咁「波神」豈不是人財兩失？唔通因為咁樣，所以要𠱁番老婆大人？
無論如何，復合都係好事；佐敦，打完波記住即刻番屋企慰妻啦！
安歷卡以為可以喺利物浦重生，點知自己翻唔到生不特止，重成為咗希斯基嘅恩人。希斯基之前嚴重缺態，大半季聯賽只入三粒，不過當佢知道自己喺隊中嘅位置受到安歷卡威脅時就突然發難，喺對列斯時梅開二度。你話希斯基係咪要多謝安歷卡呢。
列斯中場保耶同後衞米斯畀英足總重罰，搞到嚟緊個幾月都唔駛預佢兩個落場比賽。須知道佢哋都係列斯主力，如果隊波因為佢哋停賽，搞到踢唔到下屆歐冠盃而白白冇咗估計嘅三千萬鎊（約三億四千幾萬港紙），睇怕佢哋兩個要一世喺列斯打工啦！
早前有報道話拉丁歌手Enrique同俄羅斯靚女古妮高娃拍佢最新嘅MTV時，因為美人面生暗瘡而拒吻，但言猶在耳，Enrique幾日前改晒口風，話嗰次合作同古妮高娃擦出不可思議嘅火花，可恨靚女事務繁忙，錯失發展良機喎。係人都知呢啲係宣傳伎倆啦，講咁多嘢搵鬼信咩。
孫繼海雖然只係二十幾歲仔，但係就認真識得善用時間，喺禮拜一朝早出發去米字國試腳之前，利用空檔同可口可樂拍廣告，趁機賺一筆過新年。呢位國腳咁有生意頭腦，睇怕佢就算第日退休之後，都唔使愁囉。
求驗客手記逢星期一至五刊出
E-mail: