藍帆科技（8166）首日掛牌表現果然非凡，較招股價高出73%，收報41.5仙，就算30仙入市都有得賺。賺得最勁當然係主要股東海域集團（1220）啦。葉劍波隻海域持有藍帆1.69億股，投資成本每股2.34仙，以收市價41.5仙計，帳面已賺6618萬元。不過，海域股價就未有跟隨上升，早段抽高後就開始下滑，倒跌2%，收9.8仙。幕後人士似乎顧此失彼，唔通係因為彈藥唔夠？不過黑客話，藍帆歸邊，比較容易控制大局，可能重有排乾炒，而海域貨源暫時重係比較分散，好難炒。
福田實業（420）由去年初五六毫子水平炒上昨日最高1.67元，升幅達二三倍，市場又再傳出大股東打算提出每股2元私有化，不過相信係流料居多。Cookie話，此股係一隻穩定嘅高息工業股，去年銀行利息跌到接近零，因此有芬佬吸納一啲高息股，福田就係芬佬對象之一，但由於此股貨源極為歸邊，所以稍為吸納，股價就經已炒到天咁高。據聞現時嘅大股東已經無心戀戰，重點會搞私有化，反而賣殼重有啲可能。
亞洲資源（899）獲中洲集團創辦人黃光苗入股53.7%，重以每股2.5仙提出全購。消息公布後，股價升吓跌吓，都唔知佢想行邊面。i師傅話，聽講黃光苗可能重想增持，唔希望股價升得太多。此股噚日升至3.5仙隨即被有心人壓住，倒跌6.7%收市，報2.8仙，相信短期內都唔會有突破，直至收足貨為止。