唔理你反對又好，支持又好，董特首做多五年似乎已經係事實。噚日有人問八方，既然係咁，點解政府重要嘥錢宣傳呢個假選舉呢？而且政府拍嘅電視宣傳片段，只係講只要喺香港住滿七年、年過四十、又冇外國護照就可以參選，完全冇提過要攞一百個選委提名，似乎欺騙市民喎！
八方問過負責嘅政制事務局，發言人叫大家唔好咁敏感，因為公務員係政治中立嘅，唔會因為董特首參選或者唔參選，而影響選舉宣傳，加上每個選舉政府都會宣傳，即使係之前嘅選舉委員會補選都宣傳啦。至於電視片段呃人，發言人就話電視廣告時間有限，好難樣樣講晒，如果想詳盡啲就要上網睇嘞。
究竟為呢個小圈子選舉，政府用咗幾多公帑宣傳呢？答案係十萬五千四百一十四蚊，包括印海報、小冊子、電視電台廣告、網頁，重有廉署印的防貪指引，抵唔抵就見仁見智了。
E-mail：