霆鋒轟無綫特技人兒戲
柏芝飛車被點執生靠Feel

謝霆鋒昨日接受商台訪問時，大爆張柏芝早前飛車受傷前，特技人竟叫柏芝「靠feel」控制軚盤，而柏芝問她上車應怎樣做時，特技人竟叫她「執生」，十分兒戲。

張柏芝上月初為無綫仁濟籌款節目錄影飛車環節時，不慎撞傷，導致胸椎骨第十二節碎裂，卧牀休養半個月之久，日前柏芝才正式出席公開活動。
一直有傳是次意外與無綫安排的安全措施不足有關，而柏芝的好友謝霆鋒昨日接受商台《茶煲裏的查篤撑》主持查小欣的訪問時，更轉述柏芝的說話，踢爆在場的特技人員，只叫柏芝自己「執生」及「靠feel」來控制飛車。

「基本嘢都冇」
霆鋒昨日在訪問中，激憤地指摘柏芝當日飛車時的安全措施，他說：「諗起當日飛車，我諗我同德民（主持梁德民）都會一齊拍枱！架車冇筒櫈，冇得包住個人，個車尾又冇紮沙包，就會向前衝㗎喇！頭重尾輕，架車又冇紮沙包，連最基本嘅嘢都冇。我睇番錄影帶，都覺得好離譜，佢（指特技師）有冇常識㗎？」

「攞條命執生」
霆鋒續道：「夠膽講埋出嚟，當時柏芝問個stuntman（特技人）我上到去應該點做，佢話『執生囉！』大佬！你叫我攞條命嚟執生！跟住柏芝問萬一落地唔穩，揸住個軚盤點做？跟住佢話『靠feel呀！』你點可以同佢講『靠feel』、『執生』，呢啲係人命嚟㗎！」而負責當日飛車的特技師乃從事特技工作十五年的Roger，一向負責無綫綜藝節目及電視劇的特技表演。