容祖兒昨晚離港進修，前晚她作東在漁人碼頭擺餞別宴，筵開三席招呼英皇幕後工作人員，出席的圈中人則只得謝霆鋒，至於好友何韻詩，容祖兒不想被人笑而未有請她作客。
容祖兒昨晚離港到英國、日本和美國三地，展開為期兩個月的進修之旅。前晚容祖兒在銅鑼灣漁人碼頭花萬多元筵開三席，慰勞英皇幕後員工，出席的有老闆楊受成夫婦和謝霆鋒，不過霆鋒只逗留一個鐘，未開席便離開。
主人家容祖兒六時許已抵現場招呼客人，八時多她接受記者訪問，祖兒說：「今次呢餐係我自掏腰包畀錢嘅，可以話係我最豪嘅一次，不過一世人點都要豪一次嘅！我諗埋單大概幾千蚊啩。啲同事喺上面開賭局，有啤牌、麻雀同魚蝦蟹，好鬼有新年feel，我都有份玩，但只係打麻雀。」
記者問祖兒為何霆鋒只逗留一會，祖兒說：「唔緊要啦，佢送咗啲好快樂嘅時光畀我哋。我都有通知陳奕迅㗎，不過佢要拍戲所以唔得閒嚟。」
記者問祖兒為何沒有請好友何韻詩，容祖兒說：「咁敏感嘅人我唔請，費事請，費事俾你哋笑。」
至於收拾行李方面，祖兒說已經執得七七八八，她說：「嗰邊乜都有，去到先買都得，不過我係去過流浪生活，唔使買咁多嘢啦！反而我要提醒自己唔好唔見銀包，我份人好大頭蝦。」
此外，何韻詩昨日到新城電台與陳啟泰錄廣播劇，被問到昨晚會否送容祖兒機時，她突然裝瘋扮儍說：「會，一定會去！」隨後才正經表示：「佢又唔係走咗唔返嚟，之前我有同佢食飯餞行。」那麼二人在飯局時談甚麼呢？阿詩說：「同佢傾人生大事囉！」
問阿詩會否探望祖兒，又或跟祖兒一起過去？她說：「跟埋佢過去就唔好嘞，我自己又行唔開。希望佢喺嗰邊有豔遇，就可以傳我哋分手啦！」
採訪：卓寶花、陳儀敏
攝影：羅德光、陳儀敏