電盈（008）喺2.025元水平撐咗8日之後，昨日終於頂唔住，收1.97元，跌5.5仙，幅度2.7%，唔算太大。但啲電盈Call輪則幾傷吓，5件全部上晒死火榜，跌幅由11%至18%。
8號仔近期發行可換股債券，市場唔多鍾意，股價終於頂唔住，喺美國ADR時時衰過港價，2元失守後，有機會下試1.90元。雖然下跌空間唔算大，但啲電盈高溢價嘅Call輪，則因為有大槓桿效應，風險好高。9025現價15.4仙，7月到期，溢價17.9%，槓桿率12.8倍；9057現價17.7仙，10月到期，溢價22.2%，槓桿率11.1倍。呢兩件係高危貨。
若然8號仔下見1.90元，博反彈，則應揀Call輪9087，呢隻輪嘅數據實際好多。現價40仙，吼住35仙上車。
中移動（941）早段高見22.85元（升55仙）時，Call輪9029都只係做31仙（升1仙），唔肯去。中移動最後收市只升5仙，走勢轉弱。
短炒掉轉槍頭，揀中移動Put輪9033埋手，博1分錢利潤，記住手腳要快。