股壇瀏覽器:大戶好倉未見影

股壇瀏覽器:大戶好倉未見影

港股噚日牛牛皮皮,恒指收報10721,升30點,成交就萎縮至55.2億元。有人話大戶造2月期指好倉,但𠵱家都冇咩動靜,農曆長假期將近,照計冇人會揸太多倉過長假期。
藍帆(8166)今日掛牌,雖然阿虎對此股冇好感,但聽聞幕後人士為咗方便日後出貨,掛牌首日點都要搞得好好睇睇,中資今日會維持秩序,短期股價應該會見0.30元。此股上市配售2億股新股,獲超額認購9.33倍,包銷商亦已行使額外配售權2000萬股。據聞,圍飛嘅班底都相當齊心。

市傳百記沽中旅
中旅國際(308)噚日又傳出好快會賣出渭河電廠項目,不過消息不但對股價冇刺激作用,反而見百記猛咁沽貨,令股價一度大跌4.6%,收市報1.69元,跌3.4%。i師傅話去年百記幫中旅大股東配售2.2億股舊股,每股配售價1.46元,聽講當時手上坐咗唔少貨,早已經想沽好耐,𠵱家股價唔錯,因此傳佢想沽貨。
黑客話,華德豐(297)噚日又傳出大幅折讓配股,令股價大跌6.9%,收報0.67元,成交增至1594萬元。聽講朱幼麟與包銷商就折讓幅度重未傾得掂,所以有人沽貨先。
格林柯爾(8056)上周話要告瑞銀就即刻反彈23%,其後又傳出歐亞(932)都要告瑞銀,股份立即停牌,唔通聯交所認為歐亞告瑞銀可能反彈,所以要停牌先?當然唔係啦。Cookie話,國內稅務改革可能會增加歐亞利潤,所以要停牌澄清。