全球矚目電影《魔戒首部曲：魔戒現身》剛登陸香港，已經掀起一片哄動，睇過嘅人無不讚歎場景偉大，電影節奏明快、故事刺激。而佢嘅正版電影玩具亦啱啱到埗，不論吸塑Figure、着衫公仔又或發聲寶劍都樣樣有齊。不過喺全套玩具入面，最吸引嘅並唔係主角佛羅多、亞拉岡等正派角色，反而以戲中邪派戒靈、半獸人等做得最靚，夠晒神似。
記者：張穎倫
攝影：陳偉強
鳴謝：年代電影（香港）有限公司
故事簡介
哈比族人佛羅多繼承咗擁有無上魔力嘅至尊魔戒，所以引嚟暗黑君索倫同佢手下嘅追殺。為咗徹底消滅邪惡力量，佛羅多必須利用末日山派嘅熊熊烈燄先可將至尊魔戒毀滅。雖然有巫師、精靈、矮人等組成遠征隊幫手，但面對索倫強大軍隊嘅阻撓，佛羅多想抵達末日山脈確實不易。想知道佛羅多可唔可以完成使命，就要買飛入場啦！
戒靈嘅黑騎士造型，戲裏戲外都好正，黑色道袍以外衣、內衣逐件穿上，唔係一塊布包住就算，道袍之內亦着上盔甲，層次感分明。道袍更黏上泥迹，配合戲中喺水澗追殺佛羅多等人的劇情，冇面孔設計亦凸顯了兇悍的感覺。
售價：$149（吉之島）
咪睇呢啲半獸人個樣咁衰，就以為佢哋好勁，其實佢哋只係嘍囉一族，兩嘢就俾人打低。之但係今次變成公仔就威番次，面相做得夠殘夠老，拍得住特技化妝。背脊同樣設有暗掣，一按便會舉起右手揮動皮鞭，唔打得都嚇得，更附送強獸人，抵玩！
售價：$59.9（玩具反斗城）
各款Figure多數都只可以揮動右手，活動能力較低。半獸人嘅好朋友強獸人Figure，雙手就可以做出上下左右各種方向嘅擺動，非常過癮。不過講到Figure落色就唔算好靚，事關戲入面佢有種濕𣲷𣲷嘅感覺，公仔就做唔到，要玩家自己改裝先得。
售價：$59.9（吉之島）
無論係優先場抑或係正場，唔理係男定係女，一見到精靈王子勒苟拉斯出場都會大叫型仔。去到玩具，雖然大部分正派都做得唔係咁靚，但勒苟拉斯都一樣靚仔，面相做得夠英，衫花都畫得細緻，深淺色一啲都唔馬虎。更帶齊弓箭、短刀，附件特多，可能連廠方都特別冧佢。
售價：$59.9（吉之島）
呢批着衫公仔，出嘅款式雖然冇6吋吸塑Figure咁多，但身為主角嘅佛羅多當然有份。面相睇落有啲Cute，雖然唔係太似真人，但細節上極有心機，戲中佛羅多嘅一對大腳長滿鬈毛，Figure亦一一落齊。Figure迷未必覺得好正，但魔戒迷就值得珍藏。
售價：$139.9（玩具反斗城）
先此聲明，呢個阿玟着衫公仔，絕對冇麗芙泰勒真人咁索。之不過佢嘅紫色長裙都做得非常華麗，深淺色同閃爍嘅感覺都做得到，完全冇失禮阿玟呢個精靈公主角色。值得一讚係阿玟長髮中嘅三條辮，都織埋出嚟，夠晒細緻。不過髮質較硬，要經常梳理，以免披頭散髮。
售價：$139.9（玩具反斗城）
主角佛羅多嘅專用配劍，雖然只得50cm長，但已經係1:1比例。只要入兩粒AAA電，就可開動，每次揮劍都會響起刀劍交擊之聲，劍身更會亮起藍藍燈光，似足戲中遇到壞人時一樣，非常好玩，小朋友一定鍾意。
售價：$119（吉之島）
每一張遊戲卡都以劇照嚟做，靚仔靚女靚景全部有齊，唔玩齋睇都好正，每盒共有63張卡，連說明書有齊遊戲玩法。而補充裝則每包有11張卡，同一般遊戲卡差唔多。
盒裝售價：$64.9（玩具反斗城）
補充裝售價：$19.9（玩具反斗城）
＊2月8日有售
售賣點
玩具反斗城（27309462）
尖沙嘴海運大廈地庫032號舖
吉之島（28846888）
鰂魚涌康怡廣場南座地下
網頁內有齊故事、角色、拍攝過程嘅詳細介紹，亦有埋《魔戒二部曲》、《魔戒最終曲》嘅簡介。最正當然係Screensaver同WallPaper下載啦！
網址：