德國寶馬車廠自於早前推出全新7系豪華房車後，深受世界各地嘅車迷歡迎；而分屬同鄉嘅奧迪車廠，最近亦有消息傳出，話佢哋將會於今年下半年，推出新一代A8旗艦級車系，實行與寶馬7系爭一日之長短。
大家可以從預想圖中睇到，有望於今年嘅法國巴黎車展亮相嘅新一代奧迪A8車系，造型設計驟眼望落去，好似一部全新嘅A4房車咁，同樣來得年輕富活力；當中一雙頗有神氣嘅頭燈組合及鬼面罩配搭，更能令人留有深刻印象㖭。至於車廂布局方面，則由於新車仍在設計階段，故未有呢一方面嘅詳細資料；但一般相信，新車嘅車廂布局將會與現有型號相近，同樣來得豪邁不凡。然而，新車亦會有多台引擎供用家選擇，當中包括有常見嘅3.0公升V6引擎、4.2公升V8TwinTurbo引擎，以至係頂級版嘅6.0公升W12引擎都有，以迎合不同用家嘅需要。有興趣嘅車迷，就要留意新車嘅推出日期喇。